РУСКИ КЕРЕСТУР – Рушаюци од факту же у рамикох рускей националней заєднїци маме барз мало формално школовани кадри нєобходни за квалитетну роботу у театралней уметносци, Руски народни театер „Петро Ризнич Дядя“ у 2025. року реализовал циклус театралних роботньох под назву „Театер на дланї” як єден зоз способох же би ше голєм часточно превозишол тот проблем и же би ше стимуловала робота у театралней уметносци у векшини местох дзе жию Руснаци, як и же би ше подзвигнул єй квалитет. Маюци у оглядзе красне одволанє, одгук у нашей културней явносци и посцигнути резултати, РНТ и того року планує орґанизовац подобни циклус, з тей нагоди зоз фокусом на возрост дзецох од 5. по 8. класу основней школи. На роботньох би ше обрабяли основи сценскей бешеди, мимики и ґестикулациї, сценского руху и основи костимоґрафиї.
Плановане же би роботнї були реализовани през викенди у октобру и новембру 2026. року у Руским Керестуре. На роботньох буду обезбечени едукаторе, технїчна лоґистика, нєобходни материял за роботу, як и ошвиженє за шицких учашнїкох хтори треба лєм же би обезпечели приход. Шицки хтори заинтересовани за тоти роботнї треба же би попольнєли формулар (прияву) и послали го на єдну зоз шлїдуюцих адресох: РНТ „Петро Ризнич Дядя“, Русинска 75, 25233 Руски Керестур (по пошти), лєбо: rnt.djadja@gmail.com (прейґ електронскей пошти), найпознєйше по 30. септембер 2026. року.
Шицки нашо културно – уметнїцки дружтва, институциї и здруженя можу и обєдинїц шицких хтори заинтересовани и послац заєднїцку прияву у хторей би були унєшени основни податки, алє поволанка ше одноши на шицких припаднїкох нашей заєднїци возросту од 5. по 8. класу основней школи, без огляду чи су у даяким здруженю чи нє. Формулар прияви за роботнї мож превжац на Веб сайту театра.