НОВИ САД – У просторийох Заводу за кутуру войводянских Руснацох, вовторок 22. септембра отримана порядна 4. схадзка Роботного цела за науку при Националному совиту рускей националней меншини.
Присутни члени єдногласно прилапели записнїк зоз прешлей схадзки отриманей 30. мая, потим дискутоване о активносцох медзи двома схадзками, дзе ше найвецей часу пошвецело можлївосцом за порушованє ученя руского язика зоз елементами националней култури у Беоґрадзе.
Потим предлужене зоз дискусию, и забераньом становиска же важне потримац виробок „Википедиї на руским язику” и першей „Енциклопедиї Рускиньох/Руснацох Сербиї и Горватскей”.
Догварене же РЦ за науку будзе орґанизатор циклусу правописно-терминолоґийних роботньох з нагоди 55 рокох од обявйованя першого „Правопису руского язика” и 5 рокох од другого обявйованя. Як потолковане, роботнї ше будзе орґанизовац спрам потребох, а насампредз же би ше розришовало язични дилеми у руским язику, котри затераз углавним наставаю кед слово о странских терминох, дзе найвекши проблем чи направиц директни преклад, чи можебуц лєпше хасновац странски термин.
Члени тиж прилапели и предклад, же РЦ зоз своїх средствох у суми од 150.000 будзе финансовац друкованє наукового зборнїка зоз науковей конференциї на чесц проф. др Юлияна Рамача.
На концу схадзки, присутни мали нагоду потвердзиц текст котри будзе состойна часц новей Националней стратеґиї у обласци науки.