ВОЙВОДИНА – По урядовей реґистрациї нашого язика у медзинародним стандарду ISO 639-3 под кодом rsk, як и успишного активованя самостойней Википедиї на руским язику, у цеку акция за уруцованє язика войводянских Руснацох до такволаного Ґуґл-транслейту.
Додаванє нашого язика на тоту ґлобалну платформу би оможлївело директне прекладанє зоз руского язика на стотки шветово язики, и обратно, олєгчало би роботу нашим науковцом, студентом, писательом, новинаром, википедиянцом, а тото цо найважнейше – у обачлївей мири би спомалшело асимилацию и дало би стимуланс младим же би хасновали свой мацерински язик у диґиталним швеце. Потребни масовни глас нашей заєднїци же би Ґуґлово алґоритми и менаджере препознали нашу вимогу!
Поволани шицки институциї, здруженя и поєдинци же би ше уключели до заєднїцкей акциї посиланя повратних информацийох, Feedback-у, компаниї Ґуґл. Тото мож зробиц и прейґ компютера и прейґ мобилного телефона, лєм треба провадзиц шлїдуюци крочаї:
1. Прейґ компютера
Отворце интернет преглєдовач и идзце на сайт google.com. Опатриц на приложених сликох цо далєй треба зробиц.
До облачка як повратну информацию треба унєсц тот анґлийски текст:
Please add the Pannonian Rusyn language (ISO 639-3 code: rsk) to Google Translate. It is an official regional language in Vojvodina, Serbia, with an active community, digital dictionaries, and a live Wikipedia (rsk.wikipedia.org) ready for LLM training.
2. Прейґ мобилного телефона
Надпомнуце: Кед хаснуєце мобилни телефон нє идзце прейґ апликациї Google Translate (бо мобилни часто нє ма тоту опцию), алє отворце Google.com прейґ Хрома, Сафария або даєдного другого интернет преглєдовача на телефону.
Крочай 1: Отворце преглєдовач на телефону и удуркайце: google.com
Крочай 2: Кликнїце на три водоровни смужки (то Мени) хтори ше находзе у горнїм лївим углє екрана, такой при лоґотипе “Google Translate”.
Кед вам ше отвори мени, на самим сподку лїстини увидзице опцию “Send feedback” (Пошлї повратну информацию) зоз иконочку малей хмарки. Кликнїце на ню. До облака хтори ше зяви улїпце пририхтани текст на анґлийским язику и прицишнїце белаву стрелку або ґомбичку “Send” (Пошлї). Ваш глас послати!
Важне надпомнуце: Нє меняйце текст поруки на анґлийским язику! Барз важне же бизме шицки послали идентични текст, бо Ґуґлов робот (AI) реґиструє кед ше исте ключне слово (ISO 639-3, code:rsk и rsk.wikipedia.org) повтори на стотки и тисячи раз, и теди автоматично алармирує инжинєрох же би преверели о чим ше роби.