РУСКИ КЕРЕСТУР – Дзень планети Жеми, 5. юний, вчера означени и у керестурским Оддзелєню „Цицибан” ПУ „Бамби”, з додзельованьом припознаня „Желєни лїсток” и Маскенбалом.
Традицийни „Желєни лїсток” дзеци и їх виховательки тото року додзелєли Волонтерскому кампу, а у мано прешлорочного орґанизатора Кампу го прияла предсидателька Туристичного здруженя „Руски Керестур” Ивана Дудаш. Камп припознанє достал за сотруднїцтво и украшованє валалу хторе окончую волонтере.
Дзень планети Жеми, як визначела – „наймладшим и найвреднєйшим еколоґом” повинчовали и предсидателька керестурского Еколоґийного руху „Желєни персцень” др Леона Доротич Ґутеша и предсидателька його Управного одбору др Лиляна Соколова. Вони похвалели витирвали активносци и цалорочну едукацию наймладших о такей важней теми як еколоґия.
З нагоди Дня планети Жеми дзеци з „Бамбия” отримали и традицийни „Маскенбал”, та ше поприберани до рижних маскох вчера пред вечаром дружели у своєй дзецинскей заградки, а прешпацирали ше и през центер валалу, пред вельким числох Керестурцох.
З окремнима плакатами хтори виложели на капури дзецинскей заградки, дзеци жительом Керестура обрацели увагу на чуванє планети, а шицко през тидзень пририхтали на роботньох пошвецених еколоґийним темом, поготов рециклажи.
