БЕОҐРАД – Дотерашнї предсидатель Влади Александар Вучич, котри на виберанкох 2. априла з прейґ 55 одсто гласох вибрани за предсидателя Републики Сербиї, вчера урядово ступел на тоту длужносц. Вучич на церемониї у Народней скупштини пришагал же зоз шицку моцу будзе чувац сувереносц и цалосц териториї Сербиї, уключуюци и Косово и Метохию, витворйованє людских и меншинских правох и шлєбодох шицких гражданох Сербиї, почитовац Устав и закони, чувац мир и благостан шицких и же предсидательску длужносц будзе окончовац совисно и одвичательно.
После пришаги у Народней скупштини, на хторей присуствовал и дипломатски кор, чолнїки политичного и явного живота у держави и поглаваре вирских заєднїцох, на шветочносци у шедзиску Предсидателя Републики Сербиї на Андричовим венцу длужносц и предсидательски символи Александрови Вучичови урядово придал дотерашнї предсидатель Сербиї Томислав Николич.
Ступанє на длужносц предсидателя Сербиї Александра Вучича пред Народну скупштину у Беоґрадзе вчера привитали и його числени прихильнїки на митинґу потримовки, а у исти час орґанизовани и сходи учашнїкох у протесту „Процив диктатури”.
Пред тим як пришагал за предсидателя Републики, Вучич дал задзекованє на функцию предсидателя Влади Сербиї. По Уставе, после задзекованя премиєра, предсидатель Републики порушує поступок за вибор новей влади, хтору Народна скупштина ма вибрац за 30 днї. Кед Народна скупштина у тим терминє нє вибере нову владу, предсидатель Републики розпущує Скупштину и розписує нови виберанки.
