БЕОҐРАД – Предсидатель Сербиї Александар Вучич вчера явносци сообщел же, у скаладзе зоз законом, мандат за состав новей Влади Сербиї зверює Ани Брнабич, терашнєй министерки державней управи и локалней самоуправи. Як гварел, Брнабичова го обвисцела же може обезпечиц векшину посланїкох у парламенту за вибор Влади хотру предложи и наглашел же то нє пораженє за СНС, анї за було кого другого, алє идея же би ше преншало найлєпше ришенє.
Предсидатель Сербиї вчера гварел же костур Влади останє исти, алє придзе и до одредзених пременкох, як и же вироятно будзе два министерства вецей.
Ана Брнабич (1975), по фаху менаджерка и специялистка за маркетинґ, школована у ЗАД и Анґлиї, до Влади Сербиї вошла як нєстранкова особа и будзе перша предсидателька влади Сербиї у историї.
Нова Влада, на чолє з Ану Брнабич, би мала буц вибрана по 23. юний, а мандатарка Брнабичова вчера за медиї виявела же „чесц служиц своєй жеми и, кед ме Скупштина (Сербиї) вигласа, Владу будзем водзиц пошвецено и одвичательно, а свою роботу будзем робиц чесно и з любову”, додаваюци же є свидома одвичательносц яку пребера и обовязки спрам гражданох, котри обчекую же резултати роботи Влади почувствую през лєпши квалитет живота.