КУЛА – Пията схадзка Скупштини општини Кула отримана стреду, 23. септембра, а на схадзки були присутни 36 одборнїки, понеже єдна одборнїца була оправдано одсутна.
Скорей прилапйованя дньового шора, предсидатель Скупштини Велибор Милоїчич пречитал обвисценє одборнїци Ясмини Мирович Вукадинович зоз Червинки, хтора визначела же виступела зоз Одборнїцкей ґрупи „Глас младих општини Кула” и же надалєй будзе наступац як самостойни одборнїк. Так же тераз Одборнїцка ґрупа „Глас младих општини Кула” ма 17 одборнїкох.
На дньовим шоре були 11 точки, розправа була обєдинєна и подзелєна на три цалосци, а гласало ше о каждей точки окреме. Зоз векшину гласох вигласани Предлог одлуки о вименкох и дополнєньох Одлуки о буджету општини Кула за 2026. рок и Звит о вивершеню Одлуки о буджету за период од 1. януара по 30. юний 2026. року. У розправи участвовали лєм одборнїки опозициї, критикуюци звекшани буджет и наводзаци драги а нє закончени проєкти як цо то роботи на водоводу у Липару, роботи на Доме култури у Липару, дражка коло беґелю од Кули по Сивец, музей и библиотека у Кули и други.
Тиж так, зоз векшину гласох або єдногласно прилапени и други точки дньового шора як цо то Предлог одлуки о виробку Плана детальней реґулациї за будованє соларней електрарнї на териториї општини Кула, як Предлог одлуки о набавяню нєрухомосцох до явного власнїцтва општини Кула зоз нєпоштредну догварку, цо ше одношело на купованє хижи у Руским Керестуре за потреби преширеня капацитету Дзецинскей заградки „Цицибан”. Тиж так дата и согласносц на програми роботи зоз финансийнима планами установох, чий основатель општина Кула за 2027. рок, а єдна зоз нїх и Дом култури у Руским Керестуре. Медзи иншим, розпатрани и вименки Одлуки о формованю Општинского штабу за позарядово ситуациї општини Кула, а тиж ришени и даєдни кадровски питаня.
Дискусия на моменти виходзела зоз рамикох цивилизованей дискусиї та могло чуц и надкричованя и доруцованя, а предсидатель СО Кула Велибор Милоїчич подзелєл вецей явни опомнуца одборнїком опозициї, покля ше з боку векшини нїхто нє явел за слово по анї єдней точки, окрем предсидательки Општини Кула др Весни Томич хтора визначела же ше до Општини вельо уклада.