РУСКИ КЕРЕСТУР – Вчера вечар, на камерней сцени Драмского мемориялу Петра Ризнича Дядї, пред вельочислену публику успишнє виведзена представа „Бабушка” Руского културного центру з Нового Саду, за хтору текст, режию и сценоґрафию подписує Звонимир Павлович.
Представа бешедує о чежкей теми гнобеня и тортури тоталитарного режиму над поєдинцом през форму фалшивих и монтиранох „кафкиянских” процесох, репресию и перфиднєйших психолоґийних прицискох. Упечаток же ше поєдинєц после шицкого заш лєм може одупрец и витаргац з тих пазурох.
Представа була барз добре убавена, доброго ритму, минималней алє функционалней сценоґрафиї, музики, шветла и добре одбавених улогох ґлумцох шицких ґенерацийох.
Жири публики заш лєм мушел вибрац найлєпше одбавену улогу, та ше опредзелєл за Славка Бучку хтори бул одлични и упечатлїви у главней улоги єдней з бабушкох.
У представи, попри Бучка, бавели Марина Хома, Яким Грубеня, Владимир Гаргаї, Дюра Латяк, Йован Живкович, Ребека Планчак, Ася Папуґа, Борис Фейди, Александра Живкович Бучко и Любица Фечо.
Вибор музики и дизайн звука подписує Мирко Пап, дизайн шветла Ириней Гудак, костими Вукица Павлович, асистент редителя Ненад Илич, суфлер/инспициєнт Ребека Новак, сцена и реквизити Неманя Павлович, продуцент Наташа Макаї Мудрох, а орґанизатор Владимир Сивч.
Вецей фотоґрафиї мож поопатрац у нашей фотоґалериї.