НОВИ САД – Вистава репродукцийох малюнкох и кроки рисункох „Чловек медзи архитектуру и подобову уметносцу” архитекту Павла Жилника (1920–2006) отворена вчера у Руским културним центру у Новим Садзе.
Слово о потераз нєпредставяних Жилникових подобових роботох – кроки портретох робених у тушу и клайбасу, и акварелох, од хторих векшина настала ище 30-их рокох прешлого вику, а хтори у приватним власнїцтве Дюри Жилника, родзини познатого архитекту. Вон бешедовал о професийней кариєри автора, а подобови уметнїк Силвестер Макаї, хтори отворел виставу, здогаднул ше Жилника як педаґоґа и талантованого уметнїка хторого професийни вибор унапрямел ґу архитектури.
Окрем же мала нагоду поопатрац першираз виложени подобови роботи Павла Жилника, публика у новосадским РКЦ вечар могла уживац у наступе младого и талантованого пиянисти Саши Загорянского (2004) хтори и активни член РКЦ.
Просториї Руского културного центру находзаше у улїчки Йована Суботича 8 у Новим Садзе, а вистава подобових роботох Павла Жилника тирвац будзе три тижнї.