РУСКИ КЕРЕСТУР – Тогорочне штварте число глашнїка Рускей матки „Руснак”, а по шоре 29., понука информациї и звити зоз вецей подїйох отриманих у предходним периодзе.
Ту звити зоз другого зашеданя Шветовей ради Русинох/Руснацох/Лемкох у Мукачеве на Подкарпатю у України, XIV Шветовим конґресу Русинох/Руснацох/Лемкох и отриманого другого Фестивалу русинскей култури „Червена ружа трояка”.
У тим чишлє „Руснака” понукнути и тексти о означованю 10-рочнїци Етно клуба „Одняте од забуца” у Коцуре, о Стретнуцу рецитаторох у Кули у орґанизациї Руского КУД „Др Гавриїл Костельник” у рамикох тогорочней Културней манифестациї „Костельникова єшень”, як и огляднуце на XV Руски фестивал малих сценских формох „Дюра Папгаргаї” у Новим Садзе.
Литературни додаток „Зоз нашого хотара” у тим чишлє подписує Владимир Будински з Руского Керестура.
И тото число глашнїка „Руснак” пририхтане и видруковане дзекуюци финансийней потримовнки Министерства култури и информованя Републики Сербиї.
