НОВИ САД – На Филозофским факултету пияток, 25. септембра, означени Европски дзень язикох хтори пада 26. септембра. Тот дзень означує ше уж 25 роки у вецей як 40 державох хтори членїци Совиту Европи. Обдумани є же би ше промововала и очувала язична рижнородносц и култура пестованя мацеринскей бешеди. Зоз универзалним порученьом „Язики зєдинюю”, опрез будинку факултету поставена була традицийна Улїчка язикох, односно штанди шицких язичних катедрох и язикох хтори можу учиц студенти тей високошколскей установи, а медзи нїма и Оддзелєня за русинистику.
У периодзе од 10 по 14 годзин, з нащивителями – насампредз школярами новосадских основних школох алє и штредньошколцами и студентами других факултетох як и других напрямох на Филозофским факултету, стретали ше заняти и студенти язичних катедрох хтори заинтересованим пробовали приблїжиц свой язик, його специфичносци и розлики лєбо заєднїцки елементи у одношеню на други, можебуц познатши лєбо заступенши язики.
Скоро комплетне Оддзелєнє за русинистику – и заняти, и студенти, участвовали на тей манифестациї, а нащивителє на штанду русинистики могли ришовац интересантни линґвистични задатки, опробовац ше у диґиталним квизу и на други креативни способи научиц дакус вецей о нашим руским язику.
