КОЦУР – Вчера, 28. авґуста у Коцуре преславене швето Успениє пресвятей Богородици – Велька Матка Божа, односно Кирбай, котри у Коцуре означую грекокатолїцка и православна церква.
Вирни хтори ше притримую юлиянского календара тото швето преславели на Службох Божих у наших церквох, а з нїм ше Церква здогадує на одход Пречистей Дїви Мариї з того швета, кед по християнскей традициї, була на нєбо вжата и зоз своїм целом.
Вельку Службу Божу служел апостолски еґзарх за грекокатолїкох у Сербиї владика кир Георгий Джуджар у сослуженю наших паноцох.
У своєй казанї пресовящени владика Георгий бешедовал о значносци швета за шицких вирних и здогаднул на вельки жертви Пречистей Дїви Мариї.
Вашарска часц Кирбаю и розвага за наймладших нє виостали анї того року, а валал бул полни од рана до вечара.
Того року Кирбай падал вовторок, та розвага зоз музику и ди-джеями почала ище пияток, а млади ше вечарами опущовали у центру Коцура.
Вашарска часц Кирбаю тиж була богата. Окрем облєчива, прикраскох и козметики, шицки котри нащивели тоту вашарску часц могли купиц и менши домашнї животинї, еґзотични древка и квеце, ручни роботи, як и ручно правени лакотки.
Коцурци, як и прешлих рокох, зоз других местох дочековали госцох, родзину и приятельох у своїх обисцох.
