Власносц и бриґа парохиї и парохиянох

автор маф
1.1k Опатрене

Векшина теметовох прешла до власносци комуналних подприємствох хтори на сучасни способ управяю з нїма як з подприємством, а подприємство обрацене ґу заробку. Питанє чи би то нашо людзе прилапели.

Нєдавно ше на дружтвених мрежох розвязала розправа и о теметове у Руским Керестуре, одн. о крадзох хтори ше на нїм случую, та ше виношело и даєдни шмишни и нє арґументовани обвини и заключеня. Єст нєформални зауваги и на отримованє теметова, та прето пробуєме розпатриц тоту тему з парохом керестурским о. Михайлом Малацком и тутором теметова Ярославом Бодваньскийом.

Керестурски теметов власносц керестурскей парохиї св. оца Миколая. Так було од снованя валала и парохиї, кед перши теметов бул коло церкви, а потим є премесцени на обидва конци валала. Медзитим, кед викопани беґель, ткв. стари теметов остал пререзани, та ше велї гроби „премесцело” на гевтот на другим концу валала од Кули.

Єст податки же ше и на стари теметов подакого ховало дас по пейдзешати роки 20. вику. Терашнї теметов так остал єдини на хтори ше хова Керестурцох од 1816. року по нєшка. Власносц є парохиї хтора ше о нїм стара, цо уж нє часте зявенє.

– Од кеди постої Керестур, од теди постої и старанє церковней заєднїци за ньго – гвари парох керестурски о. Михайло Малацко. – Векшина теметовох прешла до власносци комуналних подприємствох хтори на сучасни способ управяю з нїма як з подпримєством. А кажде подприємство обрацене ґу пенєжу и ґу заробку. Нє знам чи би то нашо людзе прилапели. Церква плаци и основну роботу гробара, бо за дацо вецей нє ма можлївосци. Дахто дума же кед плаци роковину, ма право и на отримованє гробного местох, алє наша роковина нє така велька же бизме и то могли плациц – толкує парох о. Малацко.

05.03.2017.-Temetov 026

РОБИ ШЕ ДОБРОДЗЕЧНЄ

Як познате, о церковним маєтку, дзе спада и теметов поверхносци коло штири гольти, стара ше Церковни одбор парохиї. Уж два мандати, а то дзешец роки, о керестурским теметове рахунку водзи його тутор Ярослав Бодваньски. Вон и потолковал як ше отримує тот простор.

– У нас так ушорене же ше гробни места предава на нєогранїчени час, алє ше їх вла снїки маю старац и о отримованю гробох. Основна длужносц Церковного одбору то поипораїц коло теметова, кошиц ярок, пирскац коло дражкох, виношиц шмеце. Нєдавно зме положели нову ограду, а вилїваме и бетонски дражки и подобне. Шицко то робиме добродзенчє, а векши будовательни роботи на двох рочних акцийох, кед приду помагац и други парохиянє. То углавним нєвельке число людзох, та ше пороби кельо мож – гвари Бодваньски.

По його словох, маю барз добре сотруднїцтво зоз ЯКП „Руском” хторе помогло у пораєню од шмеца, бо поставело шейсц контейнери на два уходи и пражнї их кажди други дзень, а попри свойого парку коло каплїци, покоши и ярок коло теметова.

– На два заводи, на свою инициятиву и млади волонтере, хтори робели през лєто у кампу фарбели ограду, та и вони вельо помогли. Церква як власнїк апелує на людзох же би шмеце нє охабяли у теметове, алє у контейнерох, цо помали и прилапене, гоч ище єст даскельо „дзиви” места – визначує тутор и додава же затераз нє ришена стара часц теметова, хтори ше пробовало розчисциц зоз єдну вельку акцию, алє ту би мушел буц континуитет.

ВШАДЗИ ШЕ КРАДНЄ

Од нього дознаваме же ище скорей, Месна заєднїца купела пар гольти жеми за преширенє теметова, дзе справена каплїца, дате и за ґазну станїцу. О тим ше тераз стара „Руском”, та Бодваньски дума же би и вони могли на тей парцели отвориц и места за хованє, то би иншак и коштало, алє людзе би могли виберац дзе сцу буц поховани.

На питанє о крадзох на теметове, собешеднїки гваря же ше вони случую, нажаль, як и на других местох.

– Крадзи на нашим теметове ше случую так исто як и на других, а то прето же нам таке дружтво. Думам же нашо вирни то нє робя, та абсурдне же бизме им у церкви таке надпоминали, як дахто нєупуцени предклада. А краднє ше месинґово карики, бакарни швичнїки, пластичне квеце. Гоч зме дакеди и приявели, закон пре таки мали суми нє санкционує крадошох. Прето то даремна робота. Я би совитовал же би ше там анї нє кладло дацо барз вредне, бо у духовним смислу, то нїч нє значи нашим милим покойним. Алє уплївовац на свидомосц тих цо там беру, ми то нє можеме – визначел парох о. Малацко.

САКРАЛНЕ МЕСТО

– Сиґурно же вше мож унапредзиц отримованє. Я би апеловал на шицких, на солидарносц, прето же тот наш теметов так функционує. Кед же ми сцеме иншаки стандард, вец го мушиме и плациц. Кед людзе на то порихтани, вироятнє плациц и рочнє отримованє, най поведза. З тим же тоту сакралносц теметова зме нє годни отримац, бо за нас то святе место, дзе можеме вше мац приступ отримовац молитвени обряди – наглашел парох о. Михайло Малацко.

ПРИХОДИ НЄВЕЛЬКИ

– Гробни места ше предава за 3 000, або 6 000 динари. Зоз заробку котри ми рочнє од предатих местох маме, просеково коло 1 000 еври, углавним ше бетонує дражки по теметове. Виляте коло 1 000 метери, а кажди рок тельо кельо єст пенєжи, односно то коло 50-60 метери. Тиж зме положели и дас 500 метери огради – потолковал тутор теметова Ярослав Бодваньски.

05.03.2017.-Temetov 028

ПОВЯЗАНИ ТЕКСТИ