На державним першенстве у Ґорнїм Милановцу, хлапци народзени 2004. року вєдно зоз тренерами Милошом Митровичом и Милутином Лучичом победзели 12 екипи зоз цалей Сербиї и указали добру тактику и професионализем хтори их одведол по сам верх рукометного спорту у Вербаше.
През цалу сезону посциговали вше лєпши резултати, a бавели и на медзинародних змаганьох дзе им кус хибело же би победзели найлєпши клуби. Познєйше ше указало же длуго чекани побиди витворели праве на державним першенству. Подобно булo и зоз першим клубом Войводини, хтори були лєпши од нїх у Войводянскей лиґи, алє ше Вербащаньом, гоч були другопласовани, удало победзиц РК „Войводинуˮ у Ґорнїм Милановцу. Тренер Милош Митрович и сам гвари же чувствовал и наздавал ше же тоти побиди витворя праве на державним шампионату.
– Ми, як екипа, росли од змаганя по змаганє и були зме вше лєпши и порихтанши. За собу зме охабели другопласовану и трецепласовану екипу, охабели зме екипи як цо то Войводина, Металопластика зоз Шабцу и Нови Беоґрад, а то шицко вельки и успишни клуби. Вербас ма длугоку и добру традицию у рукомету, тот клуб дал єдних зоз найлєпших репрезентативцох Югославиї и Сербиї. Тоти хлапци сиґурно найталантованши у своєй ґенерациї и думам же лєм таки млади моци можу буц нашлїднїки тей традициї – гварел Милош Митрович.
ОСТОРОЖНИ ТРЕНИНҐИ
На тренинґох ше нє тренира лєм рукомет, алє ше бави и кошарку и фодбал. Меркує ше же би хлапци мали ширшу базу и же би нє вошли барз вчас до специялизациї за спорт. Познєйше, у старших возростох починаю робиц технїку хтора вязана лєм за рукомет. Митрович ше кус познєйше уключел до тренинґох пионирох, а потамаль зоз нїма робел Милутин Лучич хтори толкує же робота зоз хлапцами у розвою вимагаюца и муши ше окреме буц осторожни.
– Хлапци хтори тераз маю 12 и 13 роки тренираю просеково штирираз до тижня. Муша буц добре селектовани до катеґорийох же бизме з нїх могли вицагнуц максимум. Зоз нїма ше роби у ґрупох, алє маю и индивидуални тренинґи. Найвецей ше роби технїка, алє и физична и моторична часц тренинґу барз важна. Тиж так, шицко прилагодзене їх роком и їх ступню розвою. Вони маю сензитивни фази и наисце тренере муша буц фаховци же би могли робиц зоз младшима катеґориями. Щесце же тоти дзеци прави мали професионалци и зоз нїма лєгко робиц, бо су дисциплиновани – толкує Лучич.
ВЕРБАС РОЗСАДНЇК ТАЛАНТОХ
Рукометни клуб „Вербас” оформели млади ентузиясти 1954. року на чолє з тедишнїм наставнїком физичного воспитаня Воїном Ровичом. З початку ше Клуб змагал у найнїзшей медзиопштинскей лиґи, алє пошвидко дошол по Першу войводянску лиґу. У аналох клуба призначени и часи кед рукомет у Вербаше стаґнировал и нє призначовал вельки успихи на змаганьох. Менял и мено – єден час Клуб мал мено РК „Олєярки”, пре тедишнього спонзора вербаскей олєярнї. Од початку седемдзешатих рокох прешлого столїтия Вербащанє ше змагали у Єдинственей сербскей лиґи, цо бул вельки успих. У тим периодзе на вербаскей рукометней арени госцовали вельки европски клуби як цо Барселона, Стеауа, ЦСК. Фарби вербского рукометного клубу бранєли Драґо Йовович, Йовица Елезович и Зоран Пузович хтори були державни репрезентативци. Окрем нїх позарядово добри рукометаше були: Драґан Момич, Александар Стоянович, Ґолуб Докнич, Милош Орбович и Милош Митрович.
Найвекши успих Клуб зазначел у сезони 1988/89. року кед бавели у Першей союзней лиґи, а тренер бул Бранислав Кустудич хтори тиж бул єден з лєпших вербаских рукометашох.
Же успих тих младих спортистох наисце на найвисшим уровню указує и факт же шейсцме поволани за селекцию Войводини хтора 18. юния отримана на Фестивалу рукомета у Беоґраду.
ОДЛИЧНИ ШКОЛЯР И СПОРТИСТА
Од 6. по 9. юлий у Крупню будзе отримани тренажни центер за репрезентацию за найталантованших хлапцох зоз цалей Сербиї, а єден зоз хлапцох хтори обчекує поволанку и Андрия Скубан зоз Вербасу на позициї лївого кридла.
– Тренирам уж штири роки, од свойого седмого року и тренере нам одлични. Бул сом свидоми цо зме поробели и цали час сом верел же ми то можеме посцигнуц. Вежбам и дома зоз братом. Любим рукомет и вон ми на першим месце – гвари тот хлапец хтори и попри тим же кажду хвильку пошвецує рукомету одлични школяр.
Рукометни клуб „Вербас” ма коло шейдзешат хлапцох хтори розпоредзени до штирох возросних катеґорийох: кадети, пионире, младши пионире и мини рукомет, з тим же ше лєм три катеґориї змагаю, а мини рукомет звонка конкуренцийох. Тренинґи ше одвиваю у Центре за физичну културу „Драґо Йовович” и у Основней школи „Светозар Милетич”. Як гваря тренере, у прешлих рокох нє були найлєпше селектовани хлапци, алє ше то тераз меня, та ше обчекує же од идуцого року ище даєдни катеґориї виборя пласман на державне першенство.