Дзеци з писню дочекали Дїда Мраза

автор ядю, фото вев
860 Опатрене

НОВИ САД – Вчера вечар у новосадским Руским културним центру (РКЦ) отримана дзецинска крачунско-новорочна програма „Пахулька”.

У програми участвовали дзеци хтори у 20 новосадских школох факултативно уча руски язик, а хторих за тоту програму пририхтали їх наставнїци руского язика Оля Яковлєв и Ана Мария Рац. Ґу тому, свою часц програми мали и наймладши – дзеци хтори уча по руски у Предшколскей установи „Радосне дзецинство”, у обєкту „Палчочка”, зоз свою виховательку Александру Колбас.

Того року на „Пахульки” наступели и госци хтори шпивали и рецитовали на других язикох – на болгарским и словацким язику, а наступели и дзеци спред Новосадского Каритасу. Окрем писньочкох хтори одшпивал Дзецински хор РКЦ-а, свой музични талант указали Матей Фейди на саксофону, Маша Стошич и Борис Загорянски на клавиру, а Мижо Ковач представел свою презентацию о Крачуну. На концу програми шицки дзеци, з пригоднима пакециками, обрадовал Дїдо Мраз.

Програму потримали Городска управа за културу Нови Сад и Покраїнски секретарият за образованє, предписаня, управу и национални меншини.

ПОВЯЗАНИ ТЕКСТИ