Прешлого року, влєце, у Руским Керестуре ше зявел нови, млади музични бенд, котри ище вше нє ма мено, алє их то нє зопера же би явно указовали тото цо знаю. У тим бенду тройо керестурски ґимназиялци – Жарко Остоїч, Кристина Афич и Павле Рац, як и студент, Михаїл Римар з Петроварадину. У тим интервюу, дакус и през франту, виприповедали нам прецо ище вше нє маю мено, на хторих руских музичарох ше упатраю, чом нє маю часто проби, як их публика прилапела и подобне.
Як вам пришла идея основац бенд?
Ґрупа: Ище оддавна зме мали жаданє основац бенд, медзитим, на тото зме баржей патрели як на дацо цо ше може, алє нє муши витвориц. Вец зме почали грац вєдно, Кристина ше придружела ґу нам як шпивачка, нам ше то попачело, та зме на свою инициятиву, а и на предкладаня других, почали вєдно сотрудзовац.
Прецо ваша ґрупа ище вше нє ма мено? Мали сце даяки идеї як бисце ше могли волац?
Ґрупа: Мено нє маме прето же ше нам барз чежко коло того зложиц, и нє можеме нїяк направиц компромис. Пробовали зме раз у класи предложиц даскельо мена, та пайташе вигласали же бизме ше требали волац „Mindfucked”, медзитим, ми и далєй нє сиґурни до того. Любели бизме кед би нам и читателє МАК-у предложели даяки мена, на МАК-ов Фейсбук бок, лєбо гоч и нам особнє.
Понеже сце нє шицки з истого места, як сце ше здружели?
Ґрупа: Було то на єдним сходу младих у банатскей писковини, и вец зме одлучели пробовац грац вєдно…
Як часто и дзе отримуєце проби?
Ґрупа: Проби нє отримуєме часто, прето же зме нє у истим месце, а маме и рижни технїчни проблеми и подобне. Понеже нє маме простор за проби, було и таке же зме ю мали на три рано у парку, потим на Петроварадинскей твердинї, у Каритасу… Тиж так, очежує нам и тото же нє маме досц часу. Чекаме лєто же бизме ше могли частейше зиходзиц и мац проби, та гоч и даґдзе на отвореним.
Першираз сце наступели на „Акустики Рутеники” и такой сце достали награду за найлєпши перформанс. Чи вам то була мотивация за дальшу роботу?
Ґрупа: Теди гей, алє заш лєм, як зме гварели, затераз нє можеме отримовац проби поряднє. Прешлого року зме наступели и на „Дньовки”, з нашу авторску шпиванку, и єдну обробену.
Фото: Андреа Новак
Праве тота ваша авторска шпиванка „Белавооки, мой далєки” на Ютюбу ма коло 1300 препатрунки. Задовольни сце з тоту цифру?
Жарко: Понеже ю я пущам три раз на дзень, досц сом задовольни.
Ґрупа: То знїмок зоз новорочней емисиї на РТВ-у. Текст за тоту нашу першу авторску писню написала Мелания Римар, музику Кристина, а аранжман шицки вєдно. Думаме же ю публика добре прилапела, и вообще нашу ґрупу, бо нас потримую и младши, и старши.
На кого ше упатраце?
Ґрупа: Досц ше упатраме на старши руски бенди, як цо то напр. „Армитон” и „Маринер”, прето же нас їх музика здогадує на Ex YU музику, а то тото цо у шлєбодним чаше и любиме слухац, а и грац. Цо ше дотика наших бендох котри тераз актуални, упатраме ше на бенд „Crazy Cousins”. Тиж так, руски музичаре и ґрупи хторих провадзиме то и Сашо Палєнкаш, Коле, „Brainlow”…
Чи думаце же нам треба вецей руски бенди?
Ґрупа: Вшелїяк же гей. Любели бизме кед би нас у тим було вецей, як то було скорей, и кед бизме шицки ширели тоту позитивну енерґию и любов ґу музики. Думаме же би було крашнє кед би ше орґанизовало даяке збуванє, на хторим би вєдно наступели шицки руски бенди.
Хто вам окремна потримовка?
Ґрупа: Попри других, окреме бизме видвоєли бачика Сашу Палєнкаша, прето же одпочатку верел до нас, предкладал нам идеї, и ту є кед нам дацо треба. А тиж так є и наш вирни фан, а и ми його.
Чи плануєце пошвидко даґдзе наступац и дзе?
Павле: Думали зме того року наступиц на Еґзиту, алє…
Жарко: …зме одбили, бо то за нас заш лєм мале случованє. Га-га-га…
Та дзе вас, вец, можеме обчековац?
Ґрупа: Можеце нас чекац по шпиваню!
Цо би сце поручели читательом МАК-у?
Ґрупа: Здумайце нам мено, и слухайце нашу шпиванку, же би ю нє слухал лєм Жарко.
У тим штирочленовим бенду, Кристина шпивачка, Михаїл грає на инструменту дємба (файта африцких буґнох), а Жарко и Павле на акустичних ґитарох. Окрем у бенду, Кристина шпива и у Дзивоцкей шпивацкей ґрупи, ходзи на соло-шпиванє, а член є и керестурского Мишаного хору, як и Павле. Михаїл грає и на буґнох, односно на удерних инструментох. Вон грає у Руским културним центру у Новим Садзе, дзе танцує и у фолклору, а танцує тиж у новосадским Словацким културним центру „Павел Йозеф Шафарик”. Попри тим, як гвари, танцує и грає дзе ґод ше му укаже нагода, понеже то барз люби. Павле, Жарко и Кристина граю у Вельким народним оркестру у Керестуре – Кристина на примки, а Жарко и Павле на тамбурох.