БЕОҐРАД – Коло 200 000 гражданє ище нє заменєли стару паперову вожацку дозволу за нову пластичну, а остатнї термин за замену 10. юний, надпомнул директор Комитету за безпечносц транспорту Дамир Оканович.
Оканович спозорел же кара за вожачох котри буду вожиц зоз стару дозволу од 6 000 до 20 000 динари, плус два каребни поени – кед прешло менєй як шейц мешаци од кеди дозвола нєважаца, а за длугши период кара од 15 000 до 30 000 динари, плус пейц каребни поени и три мешаци забрани воженя.
Оканович потолковал же вожаче котри длугши час нє предлужели дозволу нє маю причину за старосц, бо слово о формалносци, цо значи же нїхто нє останє без дозволи, анї нє муши знова покладац вожацки испит. Кед дакому вожацка дозвола вишла пред 10 роками, годзен пойсц до полицийней станїци и достанє нову дозволу.
– Гражданє младши од 65 роки нє муша мац лїкарске потвердзенє, окрем кед маю даяки огранїченя од скорей. Дозволу мож заменїц у полицийних станїцох, а процедура єдноставна – надпомнул Оканович.
Надополнєнє за виробок вожацкей дозволи 255 динари, ґу чому тому треба додац и 621 динар за трошки видаваня дозволи, як и Републичну административну таксу од 700 динари.