РУСКИ КЕРЕСТУР – На поволанку Йозефини Угальовей, старостки места Земплинска Теплица у самоуправним Кошицким краю, з нагоди преслави 755. рочнїци Дня места, нєшка рано до Словацкей одпутовали представнїки Националного совиту Руснацох, Дому култури Руски Керестур, Месней заєднїци Руски Керестур, Фодбалского клубу „Русин” и Радио-телевизиї Войводини.
Преслава будзе тирвац два днї, 9. и 10. юния. Перши дзень будзе у спортским духу, та на соботу у приятельским змаганю наступи перши тим ФК „Русин” процив домашнїх, а на нєдзелю будзе отримана културна програма, дзе ше Дом култури Руски Керестур представи зоз штирома блоками – солистку Саню Чапко, Оркестром и Виводзацким ансамблом котри одтанцує штири хореоґрафиї.
Попри тим, плановани и шветочни приєм котрому буду присуствовац члени Совиту Месней заєднїци – Тихомир Фейди и Дюра Планчак, як и Желько Ковач котри член Совиту МЗ и предсидатель Вивершного одбору Националного совиту, а шицко на основи спорозуменя о сотруднїцтве медзи Руским Керестуром и Земплинску Теплицу, дакедишнїм Керестуром, котре подписане прешлого року под час Фестивала рускей култури „Червеней ружи”.