Концом юния ше будзе валяц обєкт котри хаснує РКЦ Нови Сад

автор ртв/ядю
1k Опатрене

НОВИ САД – Вчера вечар на схадзки Управного одбору новосадского Руского културного центра (РКЦ), предсидатель Управного одбору (УО),  Владимир Иван, предсидатель Церковного одбору новосадскей грекокатолїцкей парохиї св. Апостолох Петра и Павла и член УО РКЦ, Борислав Сакач и директорка Центра Наташа Макаї Мудрох, як наводзи Радио-телевизия Войводини, информовали членох одбору, же ше часц обєктох котри хаснує РКЦ, будзе валяц концом юния.

Будовательна фирма „Артек ґруп” д.о.о. позберала потребну документацию и концом юния почнє валяц обєкти и пририхтовац парцели за будованє нового обєкта на локациї Йована Суботича 10, дзе припадаю просториї котри хаснує Руски културни центер.

Прешлого тижня фирма „Артек ґруп” д.о.о. предложела предсидательови Церковного одбору Бориславови Сакачови же би ше и обєкти на локациї Йована Суботича 8, дзе церква власнїк, звалєли и уключели до будовательного плану, о чим вон информовал членох УО РКЦ. Схадзка Церковного одбору на хторей ше будзе розпатрац тоти понуканя  будзе отримана идуцих дньох.

По словох предсидателя УО Владимира Ивана, обєкти на чишлє 8 нє буду безпечни за хаснованє голєм док инвеститор нє почнє муровац нови обєкт на чишлє 10, та вшелїяк же за тот час треба пренайсц ришенє за дальшу роботу РКЦ. Вон тиж додал же ше, пре длугорочну традицию, наздава же у новим обєкту, Церква заш лєм предвидзи просториї за роботу Центра.

Як поведзене на схадзки, Дзецински фестивал „Веселинка”, без огляду на новонастату ситуацию, будзе отримани 9. юния, як плановане.

У наиходзацим периодзе буду орґанизовани и роботни акциї висельованя, а з Центру апелую на шицких членох и симпатизерох же би пришли помогнуц у цо векшим чишлє.

ПОВЯЗАНИ ТЕКСТИ