Млади порихтани пременїц швет

автор фес
1.2k Опатрене

Брат и шестра, Мария и Михаїл Римарово з Петроварадину, були єдни з 6 000 младих хтори ше прешлого мешаца зишли у Манили, главним городзе Филипинох, и там препровадзели даскельо днї. Инициятор таких стретнуцох – Рух фоколарох, хтори на кажди шейсц роки, вше индзей орґанизує медзинародни фестивал – Дженфест.

Фестивал давних 70-тих рокох иницировала Кяра Лубик, а тогорочни, єденасти по шоре, по першираз отримани звонка европских гранїцох. Як приблїжиц людзох и народи єдни ґу другим, як вибудовац „мости” у економиї, политики, алє и на других конарох, як шириц, промововац мир без розликох медзи людзми, були лєм дзепоєдни з инициятивох и акцийох младих у Манили.

– Млади ше закладаю за мир у швеце, же би розлики медзи людзми нє стваряли проблеми медзи нїма, алє же би тоти розлики були тото цо нас злучує – гвари Мария, задовольна же була добра атмосфера, и же видзела же млади порихтани пременїц швет на лєпше починаюци од себе з власним прикладом, зоз своїма поступками, у своєй заєднїци.

МЕСТО ЗА ПРЕГЛЇБЙОВАНЄ ВИРИ

На Филипини, познати шветови архипелаґ, шпанска власц давно пренєсла християнство, а велїм познате же там вецей як  80 одсто жительства Католїки. На билбордох, рекламох на улїцох, явних и приватних превозкох виписани виреченя з Євангелиї, и по тим видно же су вельки вирнїки.

– Людзе хторих зме упознали, так повесц, на улїци, на плажи, здравкали нам „Слава Исусу Христу” и з бешеди наисце мож видзиц же су духовни людзе, цо барз крашнє видзиц. На уходзе до явних превозкох, установох, готелох, вшадзи виписане Най Вас Бог благослови, а млади ше прежегнаю вше кед преходза коло церкви, або иду з роботи, войду нука до церкви, помодля ше и иду далєй. Видзи ше ми же ше идея Марийового дїла досц поклапя зоз филипинским позитивним менталитетом. За мнє то було добре место за преглїбйованє вири, бо сом мал нагоду звалїц свойо бариєри и предрозсудки хтори сом по теди мал ґу азиятом – щири Михаїл.

Тема тогорочного Дженфесту  була Споза шицких гранїцох, а то праве тото о чим Михаїл и Мария бешедовали. Вони вибрали роботнї о людских правох и законох. Гваря же були интересантни викладаня професорки на тамтейшим факултету, а присутни у ґрупи ше уключовали до бешеди. Кажде зоз свойого боку бешедовал на яки способ у його держави функционую закони и чи ше почитує людски права.

– Интересантне було чуц младих з Палестини же им там чежко жиц же им вше дзешка у воздуху „виши” война, алє и попри тим пошли на други конєц швета робиц на себе же би познєйше у своєй заєднїци, дома, пробовали будовац красши швет – предлужує Мария и спомина же дзивка з Индиї бешедовала о проблемох медзи кастами у єй жеми, алє и о тим же  ше власц нє заклада же би ше тот проблем даяк ришело.

– Дискриминация присутна и бешедовали зме о тим як ю превозисц.

ГОРОД ВЕЛЬКИХ КОНТРАСТОХ

Знаюци же Филипини єдна з найризичнєйших державох за живот (тайфуни, вилїви, трешеня жеми барз части), воздух и заґадзеносц рики велька, гужву у транспорту нє мож задумац, та заш лєм и попри шицким тим, Манилу валаю „Пела ориєнта”, а часто мож чуц же там найлєпше место за живот и роботу. Нашо собешеднїки приповедаю о тим як  вони дожили Манилу:

 – То город вельких контрастох. З єдного боку людзе вожа барз драги авта яки у нас нє маю анї державни делеґациї, а з другого боку живот на улїци барз виражени. Ми були змесцени у кварту у хторим елитни готели єден при другому, а опрез нашого спала мац зоз дзецми на картону, на улїци. Медзитим, вони отворени ґу странцом и нє барз ше поносую на свой способ живота. Штреднєй класи нєт, то єдна култура и швет иншаки як ту. Наша лоґика нє їх лоґика, иншаки способ роздумованя, иншаки стил живота… Нєт там правила у транспорту, на бициґлу зашвайзована метална шкатула, и ми двойо до нєй лєдво станули, а вони ше вожа по пецеро… Раз на нас камион налєцел, им то каждодньовосц, а ми були у шоку…

З другого боку, шицки муша мац драги айфони… Єден коло 800 долари, и чежко то розумиц кед ше зна же лєм на 15 минути од Манили лєм дзепоєдни маю воду у обисцу, же други воду купую, же нєт за основне – приповедаю Римарово.

З єдного боку там богатство, з другого велька бида яку нє мож зрозумиц у 21. вику. Та заш лєм, за Филипинцох гваря же су найщешлївши народ на швеце, комуникативни, нашмеяни…

– То наисце так. Попри шицких природних, економских и социялних нєпогодох хтори их потрафяю, вони вше оставаю позитивни и весели, отворени. На тото питанє нє мам прави одвит, думам же би ми требало вецей часу препровадзиц там же бим похопел тот феномен. Ми вше глєдаме причину прецо буц щешлїви, та зме можебуц прето и нєщешлїви, док вони, випатра, вельо баржей жию у терашнєй хвильки – наглас раздумує Михаїл. На добронамирних, веселих Филипинцох здогадла и Мария през бешеду як ше нашли з єдну фамелию на плажи.

– Були зме ше з Мижом купац, 100 км од Манили, и єдна фамелия, дас дзешецеро нам махали, дзеци нас цагали упознац ше зоз шицкима. На концу зме аж и полудньовали з нїма, вожели нас на автобуску станїцу, и гварели же би барз любели присц до Сербиї. Сцем повесц, худобни су, алє дали нам шицко цо мали. Цешели ше же єме їх єдзенє, и то було єдно з барз красних искуствох. Видзели зме же яки су щешлїви, и нє ясне нам було одкаль черпаю тото шесце – гваря вони.

Михаїл нєдавно дипломовал на Природно-математичним факултету у Новим Садзе на напряме за професора ґеоґрафиї, а роби у РТВ-у. Мария студент физиотерапиї на Медицинским факултету. Обидвойо на Дженфесту були по други раз, и ознова би пошли. Кажде нове путованє, гваря, нове искуство и спокуса, и ризик опробовац и дожиц иншаке, автентичне, заключуюци же вредзело прелєциц вецей як 13 000 километри, пременїц шейсц авиони, шейсц часово зони и дожиц нєфотошопирану стварносц.

Випровадзени су з ошмихами Филипинцох за хторих гваря – нє маю нїч, а маю шицко.

ВШЕ СУ У ШОРОХ

– Кажди дзень зме трацели два-три годзини на чеканє. Филипинцом нормалне же би по годзину стали у шоре же би вошли до сали. Там и полиция же би правела якиш шор, алє там тотални нєшор. Кед виходзиш зоз сали ознова  исте….

Так функционую, а док чекаю, вони ше бавя, шпиваю… Спочатку зме ше нервирали, а вец зме похопели же так муши буц, та ше ґу нїм и ми приключели – приповедаю брат и шестра.

НЄ БУЛО МИ ШИЦКО ЄДНО

– Видзели зме як там кокоси падаю як у нас шлївки, єдли зме смачни банани таки як пальци, були зме у Океан парку у Манили, чиряли зме ше з велькима рибами, айкулами, и ражу…. Инструктор чиряня ми указал же я оставам долу, а вон пошол по Марчу… Нє сцигол сом му повесц же зме ше нє так порадзели и уж видзим як ше ґу мнє приблїжує айкула… Но, то припитомени животинї и нє нападаю людзох. Тераз кед видзим фотки, та ми шмишно, алє ми теди нє було шицко єдно – приповеда Михаїл.

ПОВЯЗАНИ ТЕКСТИ