Александар Чизмар з Руского Керестура освоєл наградне путованє до Стокголму на финалне змаганє УЕФА Лиґи Европи медзи „Аяксом” з Голандиї и „Манчестер Юнайтедом” з Анґлиї 24. мая. Спомнуту награду освоєл прейґ он – лайн бависка „Дриблай до финалу”, на веб сайту дньових новинох „Блиц” котре витирвало и упарто провадзел и бавел три тижнї.
Єден з найпознатших голандских брендох пива „Амстел”, и того року бул спонзор фодбалского змаганя УЕФА Лиґи Европи. З тей нагоди, уж други рок, Амстел наградзовал и читачох „Блиц-у” з єдну уходнїцу на финалне змаганє.
Александар Чизмар з Руского Керестура бавел бависко „Дриблай до финалу” и бул найлєпши.
– Бависко було обдумане так же требало на терену предриблац цо вецей бавячох, а за тот час и прейсц цо вецей метери на терену. Кажди змагатель мал право бавиц найвецей дзешец раз на дзень. Паузи у бависку нє було, раз сом бавел нєпреривно 1,45 г. Нє знам чи и други були таки упарти, алє на концу сом бул найлєпши спомедзи 2000 бавячох – гвари Александар.
ГОСЦИНА ПРЕД ЗМАГАНЬОМ
Кед дознал же є побиднїк нє могол анї вериц, а дзе ище задумац же наисце пойдзе на таку драгу и на таке змаганє котре будзе провадзиц 50 000 патрачох, медзи котрима и велї познати. Зоз Сербиї вєдно путовали пецеро котри освоєли уходнїцу на рижних наградних бавискох, двойо новинаре и представнїца „Хайнекену”
– За мнє то була нагода провадзиц по першираз таке вельке змаганє, а о чим шнїє кажди любитель фодбалу. Зоз Сербиї зме рушели на сам дзень змаганя 24. мая на 6 г. рано, на поладнє зме уж були у Стокголму. Дочекали нас на аеродрому, у готелу зме охабели ствари и такой зме пошли до амстелового клубу на рики. То клуб за вартого типу, за спонзорох и др. Ту нам цала вислуга була безплатна, а на розполаганю нам було шицко цо и другим елитним госцом – дознаваме од Чизмара.
ВИТВОРЕНИ СОН
Шицко було добре орґанизоване, у медзичаше ше вожели на ладї по рики, та видзели прекрасни край и природу Стокголму. Змаганє починало на 20,45 г., а вони були на стадиону после 18 г.
– Финале було на „Френдс Арени” котра вибудована 2012. року, перше нас одведли под трибини знова до амстелового клубу лєм за спонзорох и їх госцох. Нє верел сом себе, алє у клубу бул и наградни погар котри сом тримал у рукох скорей як го мали шицки бавяче, там сом стретнул и славного Руда Ґулита, амбасадора Лиґи Европи и бувшого фодбалера.
Места у публики за нїх були наисце добри.
Фодбалска леґенда Руд Ґулит и Александар Чизмар
– Обок при мнє шедзел Руд Ґулит, а то за каждого чесц. Прегляд на цали терен бул одлични. Од самого бависка таких двох вельких тимох сом обчековал вецей, алє то нє зменшало мойо дожице – наглашел Александар.
По законченю змаганя, у готелу високей катеґориї котри им бул безплатно обезпечени була орґанизована пост преслава „афтер парти” котра тирвала до позних годзинох после пол ноци.
– На тей преслави було вельо обичних людзох, любительох фодбалу, орґанизаторох, спонзорох – закончує приповедку о своїм дожицу Александар Чизмар.
Розпорядок бул виполнєти цалком, алє нашли часу и за упознаванє городу скорей як цо рушели назад до Сербиї.
ЗНАЛ ЖЕ ПОБЕДЗИ У БАВИСКУ
Гоч як то випатрало нєреалне, упартосц ше виплацела. Од початку як ше реґистровал на сайту як учашнїк приповедал и твердзел же пойдзе до Стокголму и же ше му поспиши предриблац шицких. – Дрибланє у реалним швеце на терену ше нїґда нє виплаци, та можем повесц же прави фодбалер нє дрибла вельо по терену. Од дзецинства сом навияч шпанского „Реал Мадрид–а” та ше наздавам же єдного дня будзем патриц и тот клуб у змаганю за таку титулу. Жичим и нарок вельо успиху Керестурцом у „Блиц-овим” наградним бависку, понеже и прешлого року победзел Керестурец Деян Гарди – гварел Александар Чизмар.