НОВИ САД – Прешлого тижня, од 12. до 15. юлия, у Новим Садзе на Петроварадинскей твердинї закончени 18. по шоре ,,Еґзит” фестивал хтори нащивели вецей як 200 000 людзе.
Тогорочни фестивал од початку премахнул обчекованє нащивительох, дзекуюци новей продукциї главней бини. Фестивалска церемония почала зоз наступом шветового познатого балетана Серґея Полунїна, хтори виведол перформанс на тему особней шлєбоди цо бул и мото цалого фестивалу. На главней бини наступели найпопуларнєйша гип-гоп ґрупа Migos, а и Dance Arena привитала найвекши мена зоз швета ди-джеїнґу.
Други дзень фестивалу зазначел Ziggy Marley, гитмейкер Jax Jones, Марко Настич, електро-поп дуо Nipplepeople и други. На трецим дню, централне место завжала Grace Jones, Баяґа и Инструктори, Solomun а, спектакуларне законченє Еґзита представели найлєпши ди-джейове на швеце – Martin Garrix и David Guetta, хтори допринєсли же би праве остатнї дзень бул найнащивенши зоз рекордним числом од 55 000 людзох. Денс Арену заварла традицийно Nina Kraviz уж пондзелок рано.
Добре позната бина Cocta Beat & Bass основана прешлого року, а медзи другима, орґанизаторе и Drop Sensei, двоме хлапци зоз Руского Керестура – Борис Ройко и Бранимир Боянович хтори направели атмосферу за паметанє остатнього дня фестивалу.
