Бачка вєшенї, после даскелїх рокох, вошла до висшей лиґи, а и Управа клуба и бавяче задовольни же ше у нєй затримали з добрим пласманом. Тот пласман и найлєпши успих потераз у тим ранґу. Тренер першого тима, Ґоран Андєлкович, задовольни з посцигнутим резултатом. У першим тиму ма двацец активних фодбалерох. У цеку змаганя и у єшеньскей и у ярнєй часци мали периоди кед их було менєй на тренинґох, алє як гвари Андєлкович, за таке муши буц порозуменя, бо им фодбал гоби, а досц их жиє од польопривреди та ше муши робиц док сезона роботох на полю.
– Кед би бавяче вецей тренирали вообще би нє було нєреално же бизме були треци або други на таблїчки. Маме добру екипу, два роки ше нє менял состав и тренер, а резултати очиглядни, бо тельо боди у тим ранґу Бачка нїґда нє мала. Екипа компактна и кажде дал доприношенє доброму бависку – гварел тренер першого тима Бачки Ґоран Андєлкович.
РЕКОРДНА СЕЗОНА
У тим периодзе звалєни и клубски рекорди, а у континуитету дати 68 ґоли. Найлєпши стрилєц у екипи Деян Летич, а по статистики Бачки єден з найефикаснєйших бавячох, найстарши бавяч першого тима, 47–рочни Ранко Янкович котри присутни на каждим тренинґу, одбавел шицки змаганя и тей сезони дал дзевец ґоли. Рекорд з пеналами звалєл Урош Павлов котри за два роки ма сто одсто потрафени виводзеня пеналох, нє премахнул анї єден, а по статистики тренера Андєлковича звалєл аж и його особни рекорд з 1994, 1995 и 1996. року. На початку сезони циль бул же би ше остало у лиґи и же би завжали од дзешатого по пияте место на таблїчки.
– Можебуц зме могли достац и вецей боди, алє зме одлучели же би пейц кола за шором бавели младши фодбалере, бо и за нїх искуство барз важне – гваре тренер Андєлкович.
После законченя першенства за бавячох шлїдзи мешац заслуженей павзи, а Управа клуба ше будзе зиходзиц и бешедовац о тим цо треба пременїц же би ше злєпшало резултати.
ШИЦКИ ЯК ЄДЕН, ЄДЕН ЯК ШИЦКИ
– Посцигли зме єден з лєпших резултатох у историї Клуба. Бавяче задовольни и полни ентузиязму, а на лєто после павзи рушаме до нових побидох. Дас пред пейцома колами зме закончели роботу, обезпечели зме себе оставанє у лиґи и теди зме шицки були барз задовольни. Любел бим же би екипа остала у истим составу, же би ше у идуцей сезони тиж вредно робело и же бизме ознова обезпечели голєм златни штредок на таблїчки, як и тераз – гварел капитен Небойша Пантич.
Озбильнєйши период бавеня бул седем, осем кола пред законченьом першенства. Насампредз у двох або трох колох кед Бачка бавела з екипами ТСК з Темерину и Борцом зоз Шайкашу.
– Други екипи нє мали озбильне бависко, окреме нє бавели як екипа зоз Шайкашу, бо єдино вони наисце добре и квалитетно бавя, други були подєднаки ривали. Наша екипа млада, вредна, озбильна и компактна. У екипи найважнєйша тимска робота, а у тей лиґи важне и искуство, бо кед бавя даскельо млади бавяче такой ше почувствує же зме слабши – гварел найлєпши стрилєц екипи Деян Летич.
През першенство очиглядне було же у тей лиґи, у тим ранґу змаганя, лєпше судзенє, терени и атмосфера, та ше и навияче баржей интересую и приходза патриц змаганя.
– Док дорошню млади фодбалере у нашей екипи, я их волам сухе злато, бо су наисце добри, будземе ше намагац за висши пласман. Нашо фодбалере скоро шицки зоз Дюрдьова, бавяче котри од малючка у тим клубу. По моїм думаню, по питаню спорта и окреме фодбала, Дюрдьов надалєко найздравши штредок, бо будує своїх бавячох, ма свою школу и своїх школярох, а фодбалерох затримує у Клубу. По моїм думаню, найвекши упечаток сезони нашо друженя и успих. Як и тото же зме остали у тей висшей лиґи з бавячами з валалу. Бо, нє лєгко найсц добрих бавячох у валалє дзе єст лєм пейц тисячи жительох – гварел заменїк капитена Урош Павлов.
Ґоран Андєлкови, тренер ФК Бачка