Златко Емейди з Руского Керестура, лєбо Злайо, як го векшина позна, закончел штредню Електротехнїчну школу у Новим Садзе, а потим и Ґрафичне инженєрство и дизайн на новосадским Факултету технїчних наукох, дзе здобул званє Дипломованого инженєра ґрафичного инженєрства и дизайну.
Зоз МАК-ом почал сотрудзовац ище док студирал, кед почал робиц дизайн и компютерски обробок нашого часопису, а волї повесц же є арт директор, бо то, як гвари, баржей шмекерски. У МАК-у му були обявени и даскельо тексти.
Уж штварти рок, Златко заслужни за сучасносц и визуалну атрактивносц нашого часопису.
Потераз поробел дизайн и компютерски обробок уж 25 МАК-ох.
Як гвари, у роботи у МАК-у найволї кед му „лєгнє” гонорар на жиро рахунок, а нїч му нє чежко робиц. Опущує го преламовац МАК, бо ма шлєбодну форму, а и, як гвари, нїхто му нє диктирує як ма робиц, бо ма кул „шефицу” (гоч так твердзи, за вецей як три роки уж научел цо нє шме класц, бо зна напредок цо нє прейдзе при „шефици” J).
За єден МАК му, як гвари, треба коло два тижнї, алє понеже нїґда нє ма таки розкош, роби коло нього углавним коло седем днї.
Треба повесц и же даєдни илустрациї хтори видзице у часопису, Златко сам рисує, а илустровал и даскельо насловни боки. Мушиме го похвалїц за креативносц и за тото же нїґда нє пожнї, и вше начас пошлє поробени МАК.
Попри тим же є наш порядни гонорарни сотруднїк, Златко заняти у фирми хтора ше занїма зоз продукцию шматох. Маїци им главни продукт, алє, як Злайо гвари, и партки буду вишивац кед ше им добре заплаци. Його позиция у фирми то IT (ай ти). Кед дацо треба поробиц, шеф лєм скричи: Златку, ай ти!
Однєдавна ма и свою, так повесц, роботню. Ма малу друкарску машину за текстил, а попри тим роби и приватно ґрафични дизайн. Ище нє здумал конкретну назву, та гвари же бок на Фейсбуку наволал барз креативно – Štampa majica i radnih odela.
Робел и роби и дизайн рижних плакатох, флаєрох, каталоґох, маїцох, а його роботи могло видзиц на, наприклад, „Дньовкових” плакатох и маїцох, плакатох и флаєрох за Днї керестурскей паприґи, алє и на рижних козметичних каталоґох, хтори робел за иножемство. За даскельо фирми правел лоґотипи, цали промо материял за Водову фест 2011, а до своєй биоґрафиї Злайо додава и тото же фалсификовал документи людзом за визи.
Страсни є любитель компютерских бавискох. Пре нєдосц часу и нєпорозуменє околини, гвари же ше нє може вельо пошвециц виртуалному животу, алє „ту и там” ище скокнє опатриц цо ше случує у тих чудотворних шветох. Може повесц и же люби музику, алє му важнєйши текст од мелодиї, та го таки жанри и баржей прицагую. Додава и же ше подрозумює же текст муши мац смисла (Махи-махи-махи-махи-махинално!)
Питали зме ше Злайови и яка би була його идеална робота, та нам гварел же праве того дня пречитал же NASA плаци 50000$ за лєжанє два мешаци у посцелї, та ше пита же дзе ше може приявиц…