На Универзитету у Новим Садзе предложене звекшанє уписних квотох

автор днв/мар
938 Опатрене

НОВИ САД – Кед предкладанє уписних квотох будзе прилапене, Универзитет у Новим Садзе (УНС) розпише конкурс за 8 651 буджетни и 7 433 самофинансуюци места, односно за 16 084 бруцошох. Приявйованє за примаци испити будзе од 21. по 25 юний.

УНС предложел же би того року на основних и интеґрованих студийох було 5 584 буджетних бруцошох, цо за 324 вецей як прешлого року, и 4 162 самофинансуюцих, цо за 33 вецей як влонї.

За мастер студиї предложени 2 823 буджетни места, цо за 134 вецей як прешлого року и 2 726 самофинансуюци, цо за седем вецей як влонї. На докторских студийох плановани 244 буджетни места, 16 вецей як прешлого року, и 545 самофинансуюци, цо єдине зменшанє (за 35 места) у одношеню на прешли рок.

По уписним календаре на шицких универзитетох у Сербиї, прияви будуцих студентох факултети буду примац од 21. по 25. юний, примаци испити буду од 26. юния по 2. юлий, прелиминарни лїстини буду обявени найпознєйше по 3. юлий, конєчни по 10. юлий, так же упис будзе закончени по 14. юлий.

И того року од примацого испиту буду ошлєбодзени матуранти котри у трецей, лєбо штвартей класи штреднєй школи освоєли єдно спомедзи перших трох местох на републичним, або медзинародним змаганю хторе ше находза на списку Министерства просвити, науки и технолоґийного розвою, з предмету хтори ше поклада. Таким школяром будзе уписане максималне число бодох хторе мож достац на примацим испиту. Студенти з инвалидитетом маю право на покладанє примацого испиту прилагодзено їх потребом, кельо то факултет може обезпечиц.

Анї у наступним школски року школарини на УНС нє буду звекшани анї за єдну студийну програму на сербским язику.

ПОВЯЗАНИ ТЕКСТИ