БЕОҐРАД – У просторийох Заводу за унапредзенє образованя и воспитаня у Беоґрадзе вчера отримана схадзка зоз представителями националних совитох, односно їх Одборох за образованє на тему писаня програмох и резултатох (исходох) за основни и штреднї школи.
Схадзку иницировал предсидатель Координациї НС Гайнал Єне, а представительох националних совитох, упознатих зоз проблемами у писаню програмох и резултатох приялa Елеонора Влахович, руководителька Центру за розвой програми и учебнїкох. Присутни були представителє словацкей, мадярскей, румунскей, горватскей, македонскей, ческей, влашскей и рускей националней заєднїци. У розгваркох з нашей заєднїци участвовали Мелания Римар, предсидателька, и Анамария Рамач Фурман, член Одбору за образованє, хтора уключена до писаня школских програмох.
За мацерински язик шейсц национални совити (хтори маю порядну наставу на своїм язику) направели програми за пияту класу, а за мацерински зоз елементами националней култури програми ше тераз закончує. За першу класу основней школи програми и резултати би мушели буц закончени по конєц новембра того школского року, а такой потим на шоре писанє програмох и резултатох за першу класу ґимназиї.