Вчера бул „Бамби-фест” – швето наймладших

автор маф
1.3k Опатрене

РУСКИ КЕРЕСТУР – Вчера вечар у преполней сали Дому култури, дзеци зоз рускокерестурскей Дзецинскей заградки „Цицибан” отримали свой традицийни 23. „Бамби-фест”, а з нагоди означованя Дня установи ПУ „Бамби” з Кули дзе припада и тото оддзелєнє.

Як и вше, у прекрасних костимох рижних фарбох, дзеци зоз пейц воспитних ґрупох, указали цо през рок научели, од рецитацийох, шпиванкох, по танци и рижни хореоґрафиї на руски и сербски шпиванки.

Дзеци од наймладших обданїщових по предшколску ґрупу пририхтали виховательки Ксения Вучкович, Блаженка Мецек, Даниєла Сопка, Оленка Русковски и Емилия Костич зоз сотруднїцами.

Дзеци наступели и як Музична секция у Младшей и Старшей ґрупи, а пририхтала их Татяна Фейди, а указали и цо научели у двох Школох анґлийского язика дзе з нїма робя Теодора Вранєш и Александра Надь.

Програму як наявйоваче точкох збогацели мали ґлумци аматере Яна и Патрик Варґа, Сашо Палєнкаш бул музични сотруднїк, а Дом култури обезпечел Вельку салу.

На програми були присутни и директорка ПУ „Бамби” Весна Йовович и єй пецеро сотруднїци зоз Кули.

ПОВЯЗАНИ ТЕКСТИ