НОВИ САД – Драмски студио Руского културного центру у Новим Садзе вчера вечар премиєрно виведол драмске дїло „Бабушка”, за хторе текст, режию и сценоґрафию подписує Звонимир Павлович.
У представи ше розпатра ище єден аспект „кафкиянского” гнобеня тоталитарней системи над поєдинцом през форму фалшивих и вимонтираних „процесох”.
У добрим темпу и ритму, вельо векши ґлумецки ансамбл на яки зме звикли у РКЦ, винєсол представу за хтору би ше могло повесц же поставя питанє чи поєдинєц сам може победзиц тоталитарни режими. Як на концу представи мож заключиц – одвит оптимистични. Квалитету представи окреме допринєсли вибор музики и сценоґрафия.
У ансамблу ше одлично уклопели шицки ґенерациї ґлумцох – Славко Бучко, Марина Хома, Яким Грубеня, Владимир Гаргаї, Дюра Латяк, Йован Живкович, Ребека Планчак, Ася Папуґа, Борис Фейди, Александра Живкович Бучко и Любица Фечо. Проєкт финансийно помогли Покраїнски секретарият за културу и Национални совит Руснацох.
„Бабушка” будзе виведзена и на тогорочним Драмским мемориялє Петра Ризнича Дядї шлїдуюцого пиятку, 23. марца.
