МЕДЗИЛАБОРЦИ (СЛОВАЦКА) – З нагоди 89-рочнїци народзеня Ендия Варголу (6. авґуст), прешлого мешаца, 7. авґуста, Музей модерней уметносци „Енди Варгола” у Медзилабороцох, у Словацкей, явносци шветочно представел Родослов Ендия Варголи, чийо витворенє финансовал снователь Музею – Прешовски самоуправни край.
Авторе Родослову професийни уметнїки Мартина Блащакова и Мартин Кудла, котри ше занїмаю и з мальованьом родословох, у чим им помогол єден зоз сновательох Музею у Медзилабороцох и його кустос Михал Бицко. Творенє Варголового родослову тирвало коло дзевец мешаци, пише лем.фм.
Главна концепция ручно мальованого Родослову то же би на визуални способ представел историйну ґенезу того визначного уметнїка русинского походзеня и на одредзени способ „то баржей инфо-статична мапа Варголового живота”, гварела кустоска Музею Кармен Цилипова.
Ориґинални Родослов виробени на платновим паперу 115 зоз 180 центиметри. Даєдни його елементи позлацени з 24-ро каратним златом и од його представяня є часц стаємней постановки Музею модерней уметносци „Енди Варгола” у Медзилабороцох.
