ВЕРБАС – Покраїнски секретарият за польопривреду, водопривреду и лєсарство видвоєл 131,6 милиони динари за потримовку 82 ловарским здруженьом, явним подприємством и привредним дружтвом у проєктох котри ше финансую зоз средствами з Буджетского фонду за розвой ловства Автономней покраїни Войводини за 2026. рок, пренєсол општински сайт.
Спрам одлуки, финансовац ше будзе вкупно 188 проєкти, а Ловарскому здруженю Вербас 2018 одобрени 1.904.180 динари за реализованє пейцох проєктох.
Окрем за унапредзенє стану популациї дзивини и їх пребувалїща и опреманє хасновательох ловискох, додзелєни средства наменєни и за провадзенє стану дзепоєдних файтох дзивини у Войводини, набавку одроснутих фазанох, матичного чупору фазановей дзивини, як и за покарму за дзивину у штучним хованю, набавку превозкох и другей опреми.