Представени диґитални учебнїк

автор ртв/ядю, фото stock.io
866 Опатрене

БЕОҐРАД – Предсидателька Влади Сербиї Ана Брнабич вчера присуствовала на першей оглядней годзини на котрей ше хасновало диґитални учебнїк, у Основней школи „Дринка Павлович” у Беоґраду.

На представяню диґиталного наставного материялу, на годзини биолоґиї у пиятей класи, присуствовал и министер просвити, науки и технолоґийного розвою Младен Шарчевич.

Диґитални учебнїк мож хасновац самостойно и у комбинациї зоз друкованим виданьом, з котрим твори цалосц.

Влада Сербиї почала шмело и швидко зоз реформами у образовней системи и то найважнєйши задаток, гварела премиєрка Брнабич.

Вона додала же Влада Сербиї за уводзенє диґиталних учебнїкох у рамикох пилот-проєкта опредзелєла 70 милиони евра. Тото ше найвироятнєйше будзе робиц зоз Европску инвестицийну банку, гварела вона. Постої можлївосц же ше достанє и значна потримовка Европскей комисиї.

Повязали зме основни школи до академскей мрежи Сербиї, а предстої нам повязац шицки школи на швидки интернет, цо нєобходне же би ше до два тисячи учальньох у рамикох пилот-проєкта уведло диґитални учебнїки, гварела премиєрка Брнабич.

Вона виражела задовольство и зоз уводзеньом електронского дньовнїка котри уж дал резултати, бо школяре менєй хибя зоз настави, а заняти у школох троша три штварцини часу менєй за административни роботи. План бул же би ше електронски дньовнїк уведол до 200 школох, а тераз є присутни у 556 образованих установох.

Прешлого року як обовязни предмет од пиятей класи уведзени информацийни технолоґиї, програмованє и кодиранє, додала Ана Брнабич.

Министер просвити Младен Шарчевич гварел же Закон о учебнїкох котри уважи стандард диґиталних учебнїкох войдзе до скупштинскей процедури концом марца.

Авторка учебнїка котри вчера представени, Марина Дрндарски, гварела же у нїм єст рижни активносци, бависка, аудио и видео материяли, алє и експерименти.

ПОВЯЗАНИ ТЕКСТИ