РУСКИ КЕРЕСТУР − У просторийох Добродзечного огньогасноого дружтва (ДОД) у Руским Керестуре внєдзелю отримана порядна Рочна скупштина, на котрей поднєшени роботни и финансийни звит з прешлого року, представени и план роботи за тот рок, а у скоро двогодзиновей дебати розправяне о нєвигодней ситуациї добродзечних огньогасних дружтвох, и вообще огньогасцох у Войводини, та и у цалей Сербиї.
Роботни и финансийни звити поднєсол предсидатель ДОД Руски Керестур Михайло Рац. Керестурски огньогасци у прешлим року интервеновали аж 24 раз, но з того лєм два раз гашели огень на обисцох. Цалосни приходи Дружтва у прешлим року були 123 600 динари, а розходи 108 500 динари, та на рахунку им остали скромни 15 000 динари. Финансийни план за 2018. рок ище скромнєйши – плановани приходи лєм 100 000 динари, з котрих по 50 000 з видаваня локалу и з Општинского союзу огньогасцох.
На Скупштину пришли представнїки Општинского союзу зоз Кули, Войводянского союзу огньогасцох, професийних огньогасних єдинкох з Кули и Оджаку, як и добродзечних огньогасних дружтвох з Коцура, Крущичу, Дироню, Пиньвиц и Сивцу, директор ЯКП „Руском” Иґор Фейди, предсидатель Совиту МЗ Руски Керестур Владимир Олеяр, предсидатель Конїцкого клубу „Русин” Желько Папуґа, предсидатель Здруженя пензионерох Ярослав Малацко, спред Здруженя ремеселнїкох и приватних поднїмательох Михайло Семан и други гражданє Керестура.
На схадзки дотхнути рижни питаня и проблеми добродзечного огньогаства, а найвецей бешедоване о можлївосцох и способох купованя нового огньогасного камиону векшого капацитету, котри наисце нужни за будуцу роботу ДОД Руски Керестур, а цо уж на даскельо заводи препоминал командир Яким Рац.