РУСКИ КЕРЕСТУР – Основна школа „Петро Кузмяк” 23. фебруара була домашня Приятельскому турниру у мини-рукомету, на хторим, попри домашнїх, участвовали и наймладши рукометаше з Бачу, Червинки и Србобрану.
Штири мишани рукометни екипи – Рукометна секция ОШ „Петро Кузмяк”, хтору водзи тренер Славко Надь, „Ерет” з Бачу, „Лаки” з Червинки и „Србобран” зоз Србобрану бавели змаганя кажде з каждим.
Перше место освоєли рукометаше з Червинкии, друге з Бачу, треце з Керестура, а штварти були рукометаше зоз Србобрану.
Як визначел тренер Керестурцох Надь, у першим планє нє бул резултат, алє нагода же би дзеци указали цо научели з рукомету. Їх напредованє видзели и родичи керестурских наймладших рукометашох, як публика на турнире у школскей физкултурней сали.