ВЕРБАС – Подобова колония на чесц будователя беґелю Дунай-Тиса-Дунай Йозефа Киша у Вербаше отримана вчера, 7. мая на беґелю на Шлайсу, у орґанизациї Здруженя спортскух риболовцох „Златни караш“. На колониї участвовали маляре и скулпторе Здруженя подобових уметнїкох Вербасу и „Ателєа 05“.
Стретнуце орґанизоване и з нагоди поставяня скулптури „Златни караш“ Любисава Правульца опрез будинку Здруженя, на побережю купалїща Шлайс, хтору вон подаровал Здруженю.
Здруженє „Златни караш“ єдно з найстарших у Вербаше, а його предсидателька Весна Вовк гварела же то уж штварта подобова колония хтору орґанизовали з вербаскима малярами. Того року ма и векше значенє, бо зоз спомнуту скулптуру дали почесц будовательови беґелю, алє и живому швету у водох вербаского беґелю.
На колониї участвовали 15 маляре з двох вербаских здруженьох, а шицки подобово роботи направени на нєй подаровани Здруженю „Златни караш“.