РУСКИ КЕРЕСТУР – Члени Церквного одбору Катедралней церкви св. о. Миколая пондзелок мали вецей акциї у Водици и у церковней порти. У Водици перше вицагали воду зоз студзенки, а потим ю и очисцели и заменєли деску на хтору ше кладу кабли.
Як виявел тутор Водици, Владимир Чизмар, почал сциговац и материял за закрице на будинку при церквочки – док сцигнє шицко, почню и роботи на замени закрица.
Окончене и орезованє конарох коло Водици и у церковней порти, окреме коло огради. Одборци вєдно з екипу майстра Якима Папуґи, пририхтали ограду за фарбенє цо тих дньох робя волонтере Медзинародного волонтерского кампу.
