БЕОҐРАД – У рамикох Акцийного плану за меншини и Акцийного плану за Поглавє 23, Сербия муши прилапиц и Вименки и дополнєня Закона о националних совитох националних меншинох о котрих пондзелок, 16. априла, у Беоґрадзе водзена закончуюца явна розправа.
Нови закон о националних совитох националних меншинох мал би буц крочай далєй у унапредзеню положеня меншинских заєднїцох у Сербиї, бо ше одноши на образованє, културу, явне информованє и хаснованє язика, гварел отвераюци розправу министер за державну управу и локалну самоуправу Бранко Ружич.
Як преноши Радио телевизия Войводини (РТВ), на даєдни предложени ришеня Координация Националних совитох националних меншинох мала зауваги, котри през єй Заключеня представел предсидатель Координациї Єне Гайнал, а потим нагоду бешедовац о нїх мали и представнїки националних совитох.
– По тим новим закону, кед будзе таки яки є у тим Нарису, будземе ускрацени за пар, можебуц и милиони динари од наиходзацого року, лєм прето же ше у єдним члену зменшую институциї и установи хторим Национални совит снователь, гварел предсидатель Вивершного одбору Националного совиту Руснацох Желько Ковач.
На схадзки була присутна и народна посланїца Олена Папуґа котра виражела думанє же на иншаки способ требало ришиц тото нєзлучованє политичних функцийох.
– Значи предвидзене же посланїки, одборнїки, директоре установох хтори вибрани и меновани особи годни правиц лїстини, годни участвовац у виберанковим процесу, алє кед буду вибрани буду ше мушиц одлучиц же чи сцу буц наприклад посланїк лєбо одборнїк, або член Националного совиту, виявела за РТВ Папуґова.
Конкретни одвити на винєшени зауваги на остатнї Нарис закона о вименкох и дополнєньох закона о националних совитох националних меншинох вчера нє дати, а Министерство державней управи и локалней самоуправи би о 15 днї мало видац сообщенє о финалним Нарису Закона о националних совитох.