Початком януара, прилапени план новинох „Руске слово” за 2017. рок. Ниа, основни тези зоз того плану.
Главни напрям у котрим ше буду рушац новини „Руске слово” у 2017. року – то предлуженє утвердзованя структури новинох, квалитет змисту текстох и модернизация вибор темох и визуализация новинох „Руского слова” як тижньових новинох. Пре потреби маркетинґу и привредзованє, од априла 2017. року плановане же би ше звекшало обсяг новинох на 40 боки, односно же би було звекшане за штири боки.
Як и прешли два роки, и у 2017. року ше предлужує отверац новини „Руске слово” ґу Националному совиту Руснацох, односно стварянє простору за транспарентне функционованє Националного совиту Руснацох. Предлужи ше зоз рубрику „Платформа за сотруднїцтво зоз Националним совитом Руснацох”, односно, новини „Руске слово” на своїх бокох, у рубрики „Анатомия нашого часу”, обезпеча одредзени и єднаки простор за шицких членох Националного совиту Руснацох. Циль такого єдного явного простору же би ше вибераче Националного совиту Руснацох и читаче новинох „Руске слово” упознали зоз поєдинєчну роботу каждого кандидата у Националним совиту и зоз роботу Одборох, Пододборох и Роботних целох Националного совиту Руснацох. На таки способ ше обезпечи ище транспарентнєйше функционованє Националного совиту Руснацох.
И у 2017. року предлужує ше напрям ориєнтациї новинох „Руске слово” на цо ширшу и рижнороднєйшу авдиторию – од валалу по варош, од основней школи по високо образованих читачох и од младих по найстарших читачох. Як и предходних рокох, робота з младима и того року будзе мац приоритет. Млади авторе буду сотрудзовац зоз новинами, а у „Руским слове” ше будзе додатно реализовац теми за младих. За тото наменєни рубрики „Мозаїк”, „Литературне слово”, рубрика гумору, алє и обласц сучасней култури, фотоґрафиї, окреме на насловних бокох. То материяли котри повязани зоз интересами младших ґенерацийох и їх окруженя.
У складзе зоз „Стратеґию Руснацох 2020”, у плану и далєй уключовац младих авторох, котри би гонорарно сотрудзовали зоз новинами „Руске слово”. И у 2017. року предлужи ше официйне сотруднїцтво зоз Оддзелєньом за руски язик и литературу на Филозофским факултету у Новим Садзе, а їх студенти предлужа ушорйовац мешачни додаток „Руского слова” – „Литературне слово”, котре уж ушорюю од априла 2015. року, алє и рубрику „Мозаїк”. У плану же би у 2017. року „Литературне слово” и далєй орґанизовало литературни вечари, дебати и творчи стретнуца.
У 2017. року окремну увагу ше да Руснацом на сиверу Войводини, насампредз у Суботици, прд отримованьом Дня Руснацох 2018. року. Тиж так, у Бачкей Тополї и Орахове, як и у Сримскей Митровици и Горватскей.
У плану же би ше глєдало цо лєпше сотруднїцтво зоз Руснацами на Горнїци и у Канади и же би ше о нїх вецей писало. Канада – нова дияспора войводянских Руснацох. Горнїца (Словацка, Польска, Україна, Румуния и Мадярска) – простор одкаль Руснаци походза и културно у Штреднєй Европи тиж припадаю.
За контакт зоз найширшу публику и читачами, и у 2017. роки новинох „Руске слово” и далєй будзе мац отворену рубрику „Вашо писма”. На тото способ „Руске слово” жада пробовац помогнуц у ришованю даєдних общих проблемох котри можебуц може ришиц локална самоуправа.
Тиж так, у 2017. року подрубрика „Становиска” у „Руским слове”, як часц рубрики „Тижньовнїк” будзе и далєй обявйовац колумну з вецей авторами, а котри познати и ширшей заєднїци, котри буду писац тексти на актуални теми.
На основи усвоєней новей Систематизациї НВУ „Руске слово”, створени основи же би ше формовало Архиву „Руского слова”, насампредз диґиталних ПДФ виданьох, фотоґрафийох и друкованих виданьох, котру ше будзе и у 2017. року финализовац.
У складзе зоз основну штиророчну програмску концепцию одвичательного редактора, „Руске слово” концепцийно и далєй буду, насампредз, граждански новини, зоз фокусом на очуванє рускей култури, руского язика, рускей традициї и рускей културней (и административней локалней) самоуправи. Под традицию ше подрозумює информованє о очуваню традицийних руских и церковних обичайох. Под културу ше дума на широке поняце и дїялносц култури, науки и уметносци, у котрих участвую поєдинци зоз рускей заєднїци и тоти цо робя на розвою универзалних вредносцох и вредносцох важних за очуванє и розвой рускей заєднїци.
Тиж так, значне место у заєднїци треба же би мало провадзенє активносцох нєвладового сектора, у местох дзе жиє руска заєднїца, або дїялносци нєвладового сектора котри важни за общи розвой дружтва.
„Руске слово” и далєй будзе робиц виключно по Кодексу новинарох Сербиї и будзе унапредзовац тоти стандарди. Новини „Руске слово” буду зоз професийней дистанци провадзиц и дїялносц дньово-политичних активносцох котри важни за общи и интерес представительох зоз рускей националней заєднїци.