РУСКИ КЕРЕСТУР – Всоботу и внєдзелю, 5. и 6. авґуста, у Руским Керестуре на терену на Ярашу отримани Турнир у вельким фодбалє, у рамикох 26. Спортских бавискох „Яша Баков”. Участвовали штири екипи – ФК „Русин” з Руского Керестура, ФК „Искра” з Коцура, ФК „Бачка” з Дюрдьова и ФК „Свиднїк” з Републики Словацкей, та Турнир мал медзинародни характер.
У полуфиналних змаганьох „Искра” и „Бачка” одбавели 3:2, а „Свиднїк” победзел домашнї „Русин” з резултатом 3:1. Перши дзень Спортских бавискох, под час обидвох змаганьох волана и нагла медицинска помоц, за покалїченого бавяча Бачки, а потим и за бавяча Свиднїку, котри дому пойдзе з памятку и ґипсом на ноги.
Внєдзелю одбавени тиж два змаганя, за треце место „Русин” и „Бачка” бавели скрацено, пре вельку горучаву, алє напарте змаганє закончене з резултатом 3:1. Финалне змаганє почало вечаром, та є одбавене у цалосци, дзе „Искра” надвладала госцуюци „Свиднїк”, з резултатом 3:1.
После бависка на високим уровню, а зоз щирим спортским духом, за шицких учашнїкох орґанизована вечера, друженє и додзельованє припознаньох на „Лонґове”. Подпредсидаель Спортских бавискох „Яша Баков” Янко Хома диплому за освоєне штварте место придал дюрдьовскей „Бачка”, погар за треце керестурскому „Русин”, за друге екипи „Свиднїку”, а побиднїцки погар придати першепласованей коцурскей „Искри”.
Скорей вечери шицких учашнїкох привитал и член Вивершного одбору Националного совиту Руснацох Желько Ковач, та похвалєл традицию пестованя длугорочного приятельства зоз словацким „Свиднїком”.