Стари шпиванки у сучасних шматох

автор Михайло Бодянец
1.2k Опатрене

Еротика у уметносци состойна часц културного скарбу (музики, подобовей уметносци, театру, филму…) каждого народу, та так и нас, Руснацох. У крайох одкаль походзиме, окреме у Восточней Словацкей, то баржей виражене и прилапене, покля ше ми у тих крайох (на Долнєй жеми) ґу тей, за нас з добрей часци табу теми одношиме резервованше, стримано и ганьблїво.

Можебуц, пре рижни вплїви у наставаню, котри присутни и котри ше чувствую у тим музичним скарбу Руснацох (словацки, сербски, велькоруски, мадярски), музични фаховци му нє придавали даяке значенє и прето ше шпиванки з еротичну тематику нє знїмало и нє емитовало на радию, лєбо у новших часох на ТВ, а могло ше их чуц єдино од гудацох на вешельох, кед госци, после даєдного прейґмирного погарика, любели послухац и зашпивац и таки шпиванки.

Прето поздравям позарядову идею Мирослава Папа же би на сучасни способ обробел и зачувал од забуца шпиванки котри нїґдзе нє зазначени, а котри сом и сам, ище як млади музичар, пред 40 и вецей роками, грал зоз керестурскима гудацами.

После першого слуханя музичного албума „Еротика Рутеника” остал сом приємно заслупнути зоз найкрасшима упечатками у одношеню на обробки и интерпретацию. Мирослав Пап по хто зна хтори раз доказал же є велемайстор у правеню музичних обробкох и писаню аранжманох, а за кажду похвалу и инерпретациї шпивачкох Танити Ходак, Санї Дивлякович и Александри Колбас, и як солисткох, и як провадзацих вокалох. Окреме бим визначел интерпретацию Танити Ходак у шпиванки „Мили, мили цо биш робел”, хторей то бизовно найлєпша интерпретация одкеди ше занїма зоз шпиваньом. У истей шпиванки окреме инспировани и безпрекорни и провадзаци вокали. Музичне провадзенє малого составу котри творя пецеро професийни музичаре на високим уметнїцким уровню.

Треба визначиц и тото же з меншима виправками у дзепоєдних ориґиналних текстох удатно обкеровани елементи вулґарносци и порноґрафиї, зоз чим ше змист нє пременєл, а достало ше на квалитету и ширших можлївосцох презентованя тих шпиванкох.

Вибор шпиванкох добре направени, алє є, заш лєм, квантитативно огранїчени, понеже, за розлику од наших сонароднїкох на просторох Шаришу и Земплину, ми ту у Бачки и Сриму маме мало шпиванки того типу. Прето место, лєбо попри виходнярских шпиванкох „Шалєна я була” и „Ишол когут”, котри у новшим чаше прилапени на тих просторох, могло обробиц ище даєдну тутейшу старшу шпиванку (напр. „Ишло дзивче по воду”).

Облєчени до нових, сучасних шматох, зоз сучасним интерпретованьом, шицки дзевец шпиванки зоз албума „Еротика Рутеника” маю вельки вигляди буц прилапени з боку младшей рускей популациї и предлужиц свой живот ище голєм даскельо децениї, за розлику од правих гудацох котри их шпивали, а яких по наших местох вецей нєт.

 

Албум мож послухац на https://makmagazine.bandcamp.com/

 

ПОВЯЗАНИ ТЕКСТИ