Тот цо дава ґоли

автор маф
1.8k Опатрене

Як ше то у спорту гвари, о нїм ше ище будзе чуц. Наздаваме ше и вериме же так  мож повесц и за младого петнацрочного рукометаша Филипа Ороса зоз Руского Керестура. Навияче РК „Русина” го познаю по вельочислених ґолох цо давал на каждим змаганю на позициї лївого кридла.

Филип тераз член Рукометного клубу „Зомбор-електро” зоз Зомбора дo хторого зоз керестурского Русина прешол у фебруару того року. За зомборски тим практично бавел нєцалу  прешлу полусезону, пририхтує ше за нову сезону, а тих дньох з екипу одходзи и на дзешецдньово пририхтованя на Ґоч.

 Як нам виприповедал, Филип рукомет почал тренирац дас пред трома роками, у керестурским Русину, алє источашнє и фодбал.

– Любел сом обидва тоти спорти, алє дас о пол рока сом покалїчел колєно. Оцец ме совитовал же мушим вибрац єдно або друге, бо поправдзе, чежко було посцигнуц и школу и по два тренинґи. Заш лєм сом волєл рукомет, та сом вибрал предлужиц  тренирац тот спорт у хторим ми и лєпше ишло.  Любел сом тренирац и дакеди сом тренирал и зоз дзивчатску екипу же бим так мал тренинґи кажди дзень – гварел Филип.

Же му у рукомету добре ишло шведоча и звити зоз русинових змаганьох на хторих Филип на позициї лївого бека посциговал вельо ґоли, просеково пейц по змаганю, а найвецей осем.

МАЛ ОД КОГО НАШЛЇДЗИЦ ПРИТОКУ

Розуми ше же Филип вельку притоку за спорт позберал од своєй фамелиї. Оцец Звонимир спочатку бул рукоменти, а познєйше фодбалски ґолман у Русину, и велїх других клубох. Добри Русинов рукометаш бул и дїдо Дюра, а старши Керестурци паметаю же на позициї лївого кридла бул майстр давац ґоли зоз мертвого угла.

И Филип рушел по їх шлїдох, и зоз своїм талантом, а як видзиме и вельку дзеку и упартосцу, бо є вредни и сцели, годзен досцигнуц и свойо рукометни сни – постац професийни бавяч.

Филипово квалитети як бавяча уж замерковали велї тренере и з Вербасу, з новосадскей Войводини дзе бул на проби, зоз шабацкей Металопластики. Алє Филип за початок вибрал Зомбор як мирнєйше место, а поправдзе и блїжей ґу Керестуру, та як гвари, можебуц же Войводина будзе треца ґарадича.

ОД СЕПТЕМБРА НОВА СЕЗОНА

До Зомбора Филип дотераз мушел кажди дзень путовац, та го на тренинґи и по два, або три змаганя у тижню вожел оцец, но од септембра му будзе лєгчейше. Як закончел осму класу ОШ „Петро Кузмяк” уписал ше до штреднєй Електротехнїчней у Зомборе на напрям електротехнїчар енерґетики. Тренирац будзе и за младши тим, а вше баржей и за перши тим, як уж и започал у прешлей полусезони.

– У младшим тиму т. є. з моїма парняками (2002.)  бавели зме у Супер А лиґи, и од 12 екипох зме були осми, но верим же будзе и лєпше. Старша екипа бави у найнїзшей лиґи, алє верим же и ту будзе напредовац. За тот час док сом бавел, у 12 змаганьох, а то дас половка, дал сом 63 ґоли за младшу и три за старшу екипу дзе сом менєй бавел –  толкує нам Филип.

Ма барз красне искуство и на державнм першенстве дзе бул зоз старшу екипу, дзе од дванац екипох були треци.

У Филипови препознаваме вельку дзеку озбильно тренирац и пошвециц ше рукомету, та и напредовац, єдного дня и по професийни уровень. И ми му жичиме най витвори свой сон.

Филип у Зомбор-електро ноши число 10

Филип у Зомбор-електро ноши число 10

ПОВЯЗАНИ ТЕКСТИ