РУСКИ КЕРЕСТУР – Пред числену публику у Велькей сали Дому култури у Руским Керестуре домашнї музично-танєчни ансамбл вчера, 14. мая вечар, отримал барз удатни концерт, на хторим представени репертоар з хторим аматере Дому култури концом априла и початком мая госцовали у Словацкей на Фестивалє „Токай у Европи”, односно „Дїдовщина”, у Словацким Новим Месце. Попри на Фестивалє, наступали у ище трох местох у Кошицким самоуправним краю – Земплинскей Теплици, Сланским Новим Месце и Чергове.
Виводзацки танєчни ансамбл Дому култури ше представел з пейцома хореоґрафиями, медзи хторима Шопски танци на концу концерту одтанцовал и на „бис”, а публика танєчнїкох наградзела и з аплаузом на стояцо.
Под час цалого концерту шицки виводзаче – Дзивоцка шпивацка ґрупа, шпивацки дует Дорика Чизмар-Наташа Колєсар, соло-шпиваче Кристина Афич, Саня Чапко и Мирослав Малацко, фолклораше и Народни оркестер Дому култури, хтори их провадзел, а и сам одграл Венчик руских шпиванкох, доставали аплаузи на отвореней сцени.
Танєчни ансамбл пририхтал Сашо Паленкаш, а Оркестер, Дзивоцку шпивацку ґрупу и шпивачох Мирко Преґун. Хореоґрафиї обдумали Силвестер Ґача, Йоаким Рац Мими, котри бул и домашнї на концерту, и Ґабриєла Саянкович.