БЕОҐРАД – Шеснасти Медзинародни конґрес славистох у Беоґрадзе почал 19. авґуста, а на нїм участвує вецей як тисяч учашнїки зоз коло штерацец державох швета, преноши сайт Радио телевизиї Войводини.
Вчера покровитель Медзинародного конґресу славистох, предсидатель Републики Сербиї Александар Вучич, пририхтал приєм за учашнїкох котри поручели же Беоґрад хвильково штредок швета и шветовей науки у язику, литератури и култури.
Медзи велїма учашнїками, на конґресу участвую и фаховци за руски язик и литературу. На Филолоґийним факултету преподаванє на тему „Погляд на швет Русинох у Угорскей през призму апокрифох з їх рукописних збиркох зоз 18. и 19. вику” отримал проф. др Янко Рамач зоз Оддзелєня за русинистику Филозофского факултету у Новим Садзе.
У Секциї Розвой славянских язикох у условийох язичного контакту на Филолоґийним факултету, „О тенденцийох виполньованя мадярскей ортоґрафиї у русинским язику”, преподаванє отримала проф. др Марияна Лявинец Уґрин зоз Факултету у Нїредьгази у Мадярскей.
На сходзе, попри преподаваньох з обласци язика и литератури, отримани и промоциї кнїжкох з тей обласци, округли столи, трибини, пленарни зашеданя и концерти.
Шеснасти Медзинародни конґрес славистох будзе тирвац до 27. авґуста.