ВЕЛЬКА ҐОРИЦА (РЕПУБЛИКА ГОРВАТСКА) – Пияток, 23. марца, на Народним отвореним универзитету у Велькей Ґорици, отворена вистава писанкох националних меншинох Городу Заґреб и Заґребацкей жупаниї, пише на сайту Союзу Руснацох Републики Горватскей.
Кажда од дзешец националних меншинох хтори участвую на вистави – Чехи, Мадяре, Македонци, Поляки, Русиянє, Руснаци, Словаци, Словенци, Талиянє и Українци, заинтересованим представели свойо писанки и традицийни вельконоцни єдла, як и обичаї и традицийни способи писаня и фарбеня писанкох. Руснаци представели нє лєм писанки, алє и сирец и паску.
На вистави присуствовал городоначалнїк Милан Бандич и Елизабета Кнор, помоцнїца началнїка Сектора за промовованє людских правох, цивилне дружтво и национални меншини Городу Заґреб.