ВЕРБАС – Найновши роман академика Юлияна Тамаша написани по сербски „Река Мономаха, мерач посмртноґ времена“ представени вчера, 28. марца, у велькей сали КПД „Карпати“ у Вербаше. На промоциї бешедовали автор роману и Микола Шанта, а до дискусиї ше познєйше уключела и числена публика.
– То пияти роман Юлияна Тамаша, а други написани по сербски. Найинтересантнєйше же кнїжка у ствари автобиоґрафски роман, хтори бешедує о феномену любови. Косцанїк любовней приповедки представя мейл-преписка медзи автором и женску особу з його живота – визначел Шанта на представяню роману.
Юлиян Тамаш потвердзел же кажда особа у тим роману автентична, алє виявел и же тота кнїжка источашнє представя його одпитованє од любови ґу женом.
– Кажда подоба и подїя у тим роману правдива. Прето тоти котри ме нє познаю, треба же би го читали як роман, а тоти цо ме познаю, най кнїжу читаю як мемоари. Жена з котру ше дописуєм у тим роману ме инспировала за штири кнїжки хтори сом видал, и за тото сом єй подзековни – гварел Тамаш на промоциї.
На вчерайшей програми присуствовали и републични посланїци Олена Папуґа и Марияна Мараш, а промоцию урядово отворел мр Серґей Тамаш. После представяня роману, до бешеди ше спонтано уключела и публика з питанями вязанима за тематику роману, алє и авторову творчосц вообще.
