КОЦУР – Вчера, 31. мая, у коцурскей Основней школи „Братство єдинство” отримана промоция Штреднєй школи з домом школярох „Петро Кузмяк” з Руского Керестура и Ґимназиї по руски.
Школяром осмей класи прейґ видео-биму приказани випатрунок Школи и школски просториї, змесценє у интернату, школска библиотека, физкултурна сала, терховня и други просториї за рижни активносци у Школи.
Директорка керестурскей школи Хелена Пашо Павлович представела коцурским школяром напрями хтори Школа понука и о проєктох хтори запровадзую, а школярки трецей класи Ґимназиї на руским язику Марина Роман и Йована Ноґавица, як и Коцурец Марко Буила котри ходзи до другей класи керестурскей Ґимназиї, бешедовали о школованю, о наставнїкох и рижних активносцох котри у Школи и у Керестуре интересантни младим.
На представяню Школи присуствовл и предсидатель Вивершного одбору Националного совиту Руснацох Желько Ковач и пояшнєл на яки способ Национални совит помага школяром котри предлужа школованє на мацеринским язику у Ґимназиї.
Директорка коцурскей Школи Славица Байор подзековала госцом зоз керестурскей Школи на презентациї.
