НОВИ САД – Всоботу, 14. априла, Драмски студио Руского културного центру у Новим Садзе (РКЦ) репризно виведол драмске дїло „Бабушка”, за хтору текст, режию и сценоґрафию подписує Звонимир Павлович
Новосадска публика мала нагоду по други раз патриц добре убавене и динамичне виводзенє „Бабушки”. И док пре партерне виводзенє представи на премиєри хибело места за публику, з тей нагоди бул шлєбодни места, алє и заинтересованих за друге тото виводзенє.
У представи участвує векши ґлумецки ансамбл на яки зме звикли у РКЦ, а одлично ше уклопели вецей ґенерациї ґлумцох – Славко Бучко, Марина Хома, Яким Грубеня, Владимир Гаргаї, Дюра Латяк, Йован Живкович, Ребека Планчак, Ася Папуґа, Борис Фейди, Александра Живкович Бучко и Любица Фечо.
Квалитету представи окреме доприноши вибор музики и дизайн звука Мирослава Папа, за дизайн шветла бул задлужени Ириней Гудак, а за костими и ґардеробу Вукица Павлович.
Представа „Бабушка” виведзена премиєрно 16. марца у РКЦ у Новим Садзе, а 23. марца участвовала на тогорочним Драмским мемориялє Петра Ризнича Дядї.