НОВИ САД – Покраїнски секретар за високе образованє и наукововиглєдовацку дїялносц др Зоран Милошевич вчера, 15. юния, представительом акредитованих високошколских установох уручел контракти за финансованє наукововиглєдовацких проєктох националних меншинох-националних заєднїцох, а на основи Явного конкурсу.
За спомнути проєкти з буджету АПВ опредзелєни 4 милиони динари, на Конкурс сцигли вєдно 18 прияви, а одобрени средства за 10 проєкти з пейц високошколских институцийох – з Филозофского и Технолоґийного факултету у Новим Садзе, Учительского факултету на мадярским язику у Суботици, Педаґоґийного факултету у Зомборе и Универзитету ЕДУКОНС, Факултету дїловней економиї.
Медзи проєктами хтори достаню средства и проєкт Оддзелєня за русинистику Филозофского факултету у Новим Садзе, з назву „Сучасни стан у русинистики: язик, литература и култура”, а руководитель проєкту др Янко Рамач.
Найвецей проєкти одобрени за мадярску националну заєднїцу – штири, два за ромску и по єден за румунску, словацку, руску и бунєвску националну меншину.
Як на шветочносци з нагоди уручованя контрактох гварел покраїнски секретар др Милошевич, попри фахових совитох, потримовку проєктом дали и национални совити националних меншинох, а обчекує же идуцого року за науково проєкти националних меншинох буду опредзелєни вецей средства.