ДЮРДЬОВ – Стан єшеньских шацох, препоруки за шатву, спокуси у польопривреди, додатни заробок, значносц добрей орґанизациї польопривреднїкох и державней системи хтора би им мала помогнуц у пласованю польопривредних продуктох – були теми преподаваня хторе у Дюрдьове отримане пондзелок, 6. фебруара, а у орґанизациї Общей землєдїлскей задруґи „Родне польо” з Дюрдьова.
Польопривреднїком бешедовали мр Янко Пап и Александар Давидов з Польопривредней станїци Нови Сад, а найвецей о дополнєню основних приходох попри заробку од жита, кукурици и сої. Мр Янко Пап аналитично, детально и реално представел пестованє и пласованє вецей файтох желєняви и овоци, у чим облапел и валалски туризем, орґанску продукцию поживи и других домашнїх продуктох.
Медзитим, як заключене, здруженя и задруґи нє можу дїловац з профитом кед нє маю помоц од держави и добру систематизацию.
– Людзе робя з вельку дзеку, алє нє и прето же тарґовище глєда тот продукт. Збунєти су, почали пестовац малину, аронию, та и ної, шлїмаки, пауловниї и други рижни древа, мед, алє нїч нє дава достаточни резултати. Укладанє средствох нїч нє ґарантує, бо продукт нєт кому предац. Параст препущени сам себе, прето треба же би шицко записовал и раховал, та на основи того заключовал – гварел мр Янко Пап.
На преподаваю винєшени и рижни статистики, а на вецей заводи здогаднуте же оптимални час за шатву жита од 5. по 25. октобер, бо ше з каждим дньом пожнєня траци 100 кили жита.
Преподавателє дзечнє одвитовали на питаня парастох, дзе и о (нє)браню кредитох, о потреби нєпреривного усовершованя и важносци водзеня кнїжки поля, з хторей мож вельо зключиц и дойсц до лєпшого урожаю.