БЕОҐРАД – У Беоґрадзе вчера отримана схадзка Координациї националних совитох националних меншинох у Сербиї, на хторей за предшедуюцу Координациї вибрана Ана Томанова Маканова, предсидателька Националного совиту (НС) Словацох и подпредсидателька Скупштини АП Войводини, а за єй заменїка Есад Джуджо, подпредсидатель Националного совиту Бошнякох.
На схадзки новоконституованей Координациї после прешлорочних виберанких за национални совити присуствовали представителє 19 националних совитох, з 21 кельо єст у Сербиї, а нє були лєм представителє НС Македонцох и Болгарох. Спред НС Руснацох на схадзки присуствовал заменїк предсидателя Совиту Йовґен Мудри.
Як Рутенпрес дознава од Мудрия, бешедоване о будуцей, як поведзене – вельо орґанизованшей роботи и значнєйшей улоги Координациї НС, же би тото цело постало одвичательни и ровноправни партнер держави у витворйованю шицких правох националних меншинох. Догварене же шедзиско Координациї НС будзе у Палати Сербия, у просторийох хтори за тоту намену Координациї уступела Влада Сербиї.
На схадзки найвецей бешедоване о вирабяню Акцийного плану за витворйованє правох националних меншинох за прегваряцке поглавє 23 у приступних прегваркох з Европску унию. У 25-членовей Роботней ґрупи за виробок Плану и седем представителє националних совитох, но як заключене на схадзки, Координация вимага же би ше до Роботней ґрупи уключело и предшедуюцу Координациї, та представительох з НС Албанцох и НС Ромох, котри после схадзки Координациї присуствовали и на першей схадзки спомнутей Роботней ґрупи.
Тиж так, Координация вимага же би мала векши уплїв на виробок Акцийного плану за поглавє 23 пре заступанє интересох националних меншинох и совитох, понеже, як поведзене – тото цо будзе записане у тим поглавю, так и останє по приступаню ґу ЕУ. Прето Координация оснує и свою окремну Роботну ґрупу за виробок и провадзенє витворйованя Акцийного плану, алє и вообще – за системске ришованє проблемох у витворйованю правох шицких националних меншинох у Сербиї.
Зоз схадзки Координациї дата инициятива за зволованє Републичного совиту за национални меншини, а єст спознаня же схадзка того цела пошвидко будзе и отримана.