Фото: М. Джуджар

ЦО ДУМАШ, ЯКИ ДЗЕЦИ МАЮ ПРАВА?

Иван Варґа, 5,5 роки, Руски Керестур: Дзеци маю право шмеяц ше и бавиц ше.  

Серґий Арваї, IV, Коцур: Маю право бавиц ше, повесц свойо думанє, виберац товаришох зоз хторима ше буду бавиц, маю право на защиту од насилства.

Виктор Кулич, VI, Коцур: Право на образованє и найлєпши животни и здравствени условия за правилни розвой. Тиж так, маю право жиц зоз родичами хтори ше стараю о нїх. На концу шицкого, дзеци маю право бавиц ше и дружиц зоз товаришами.

Кристина Гарвильчак, V, Руски Керестур: Маю право на школованє, пойсц до дохтора кед потребне, право на свойо думанє и право на бависко.

Яна Тимко, VI, Коцур: Право на свойо думанє, право на фамелию и любов, на образованє, право на лїченє, на защиту од насилства…

Иван Чапко, III, Руски Керестур: Маю ше право бавиц, занїмац ше зоз спортом, мац пайташох.

Иван Тимко, VI, Коцур: Дзеци маю право на школованє на своїм язику и мрияц.

Христина Шовлянски, III, Коцур: Шицки дзеци маю право буц щешлїви и же би були свойо!

ЯКИ ТВОЙО МРИЇ?

Серґий Арваї, IV, Коцур: Вельо путовац по швеце. Любел бим видзиц шицки континенти и вельо держави.

Кристина Гарвильчак, V, Руски Керестур: Пойсц на даяки концерт уживо и до иножемства.

Иван Тимко, VI, Коцур: Же можем лєциц як птица. 

Андрей Балїнт, VII, Дюрдьов: Же бим жил на валалє док одрошнєм.

Милана Йованов, VII, Дюрдьов: Же бим була фризерка.

Иван Чапко, III, Руски Керестур: Упознац фодбалерох и буц фодбалер док вирошнєм.

Мария Рамач, VII, Дюрдьов: Же бим постала дохторка и була успишна.

Владимир Молнар, VII, Дюрдьов: Же бим ше уписал до добрей школи.

Яна Тимко, VI, Коцур: Путованє по швеце, алє и же би швет постал лєпши.

Страхиня Йованович, III, Дюрдьов: Же бим єдного дня бул учитель. И о рижних путованьох, а найволєл бим пойсц до Русиї.

ЯК ДЗЕЦИ МОЖУ ТВОРИЦ ЛЄПШИ ШВЕТ?

Мария Рамач, VII, Дюрдьов: Кед би шицки дзеци почитовали старших и кед би ше шицки учели же би постали успишни, могли би пременїц швет.

Виктор Кулич, VI, Коцур: Так же буду чувац и нє заґадзовац природу. Кед буду слухац своїх родичох и буду зложни зоз шицкима.  

Кристина Гарвильчак, V, Руски Керестур: Так же ше буду крашнє справовац, нє заґадзовац природу, помагац старшим и почитовац єдни других.

Серґий Арваї, IV, Коцур: Дзеци би требали помагац дома родичом и старим людзом, здравкац людзом на улїчки, накармиц животинї хтори нє маю своїх ґаздох. Буц добри, нє вадзиц ше и нє биц. Крашнє ше справовац.

Лара Салак, III, Дюрдьов:  Зопрец шицки войни на швеце, же би шицки людзе на швеце були добри и старали ше о очуваню природи.

Иван Чапко, III, Руски Керестур: Зберац шмеце, пораїц швет, посадзиц древа.

Яна Тимко, VI, Коцур: Можу аж и зоз малима стварами. Можу го злєпшац з доброту и почитованьом, стараньом о природи, зоз ученьом, ширеньом мира, тиж так и зоз креативносцу.

Страхиня Йованович, III, Дюрдьов: Нє заґадзовац воздух и животни штредок, любиц и чувац животинї, крадошох научиц най вецей нє крадню и заврец шицки гарешти, розвивац пристойне справованє и почитованє розликох при людзох, мац емпатию ґу шицким, любиц єдни других. 

Иван Варґа, 5,5 роки, Руски Керестур: Дзеци можу твориц лєпши швет так же ше нє буду биц.

Иван Тимко, VI, Коцур: Так же буду вецей мрияц.

Марко Станкович, VII, Дюрдьов: Кед буду шицки почитовац правила. 

Христина Шовлянски, III, Коцур: Дзеци творя лєпши швет кед су щешлїви, а же бизме були щешлїви, нє треба же бизме ше вадзели, били, огваряли, упрекосцели.

Андрей Балїнт, VII, Дюрдьов: Кед би нє знїщовали шицко пред собу и кед би зношели пошлїдки за тото.

Филип Хромиш, III, Дюрдьов: Правиц вецей забавни парки за дзеци, ушорйовац валали и вароши на нєзвичайни способ, пременїц архитектуру…